Валандово на 26. и 27. мај повторно ќе биде центар на македонската народна песна

Валандово на 26. и 27. мај повторно ќе биде центар на македонската народна песна. Фолк Фест Валандово 2026 го носи своето 39-то издание, со две фестивалски вечери посветени на традицијата, новите композиции, сценската емоција и песните што со децении го градат музичкиот идентитет на Македонија.

Овогодинешното издание се најавува како едно од најдобрите во поновата историја на фестивалот, а според продукциската поставеност, техничките стандарди, визуелниот концепт, аудио реализацијата и телевизиската презентација, како најсупериорното издание досега. Фолк Фест Валандово 2026 ја поставува валандовската фестивалска приказна на повисоко продукциско ниво, со современ сценски јазик и силно чувство на гордост кон македонската песна.

Годинешниот слоган на фестивалот е „Да ни е жива песната македонска!“, инспириран од рефрен на Војо Стојановски, отпеан токму на сцената во Валандово. Оваа фестивалска порака ја поврзува историјата на фестивалот со неговата денешна мисија, македонската песна да продолжи да живее, да се пее и да се пренесува.

Зад овогодинешното издание стои голем организациски, уметнички и технички тим, со повеќе од 80 луѓе вклучени во подготовката и реализацијата на фестивалот. Од сцената, светлото, тонот и видеопродукцијата, до протоколот, прес-служба, логистиката, пробите, ред карпет сегментот и телевизискиот пренос, Фолк Фест Валандово 2026 се подготвува како комплексна национална продукција, во која секој детал има свое место.

Годинава особено внимание се посветува на целокупниот сценски и телевизиски впечаток. Техничкиот директор Ѓоко Павлов ја координира реализацијата на сцената, озвучувањето, осветлувањето, видеопродукцијата и сите тимови зад сцената, со цел публиката во салата и пред телевизиските екрани да добие чист звук, модерна визуелна слика и фестивал без технички застој. Фестивалот најавува модерно сценско решение, значително подобрено осветлување, динамични светлосни ефекти, квалитетен звук и силна видеопродукција, со посебно внимание на тонската слика, бидејќи музиката е суштината на фестивалот.

На 26 мај, вторник, на плоштадот во Валандово ќе се одржи предфестивалската вечер, замислена како големо музичко шоу под отворено небо. Публиката ќе има можност повторно

На сцената ќе настапат Блага Петреска, Елена Велеска, Кате Соната, Христијан Божинов, Мишко Крстевски и Марјан Коцев. Шесте изведувачи ќе бидат дел од заедничка сценска приказна во која песните ќе се надоврзуваат една на друга, со солистички изведби, дуети и заеднички моменти. Додека еден ја носи песната, останатите ќе ја дополнуваат атмосферата на сцената, создавајќи живо, разиграно и поинакво фестивалско искуство.

Тоа ќе биде вечер на песни што се препознаваат од првите тактови, што носат спомен, мерак и онаа посебна валандовска емоција по која фестивалот е препознатлив. Песни што продолжиле да живеат меѓу генерации публика и да останат дел од народната музичка меморија.

За музичката придружба ќе се погрижи оркестарот од емисијата „Мерак меана“ на Сител телевизија, а вечерта ќе ја заокружи мини концертот на Влатко Миладиноски, како посебен музички момент за публиката и силна најава на големата фестивалска вечер што следува.

Снимка од предфестивалската вечер ќе се емитува наскоро на МТВ.

На 27 мај, среда, во салата „Јанко Узунов“ во Валандово ќе се одржи големата фестивалска вечер со 20 нови композиции и директен пренос на МТВ 1 со почеток во 20.30 часот.

Фестивалската сцена „Јанко Узунов“ има особена културна тежина во македонската музичка историја. Како една од најголемите активни сали од ваков тип во земјата, веднаш по големата сала на Македонската филхармонија како референтен концертен објект, таа е значајна по својот капацитет и по музичката историја создадена на неа. Токму од оваа сцена се отпеале едни од најголемите македонски рефрени, песни што денес народот ги препознава како дел од современиот македонски идентитет.

Во музичкиот дел, фестивалот останува цврсто врзан за својата основна мисија. Уметничкиот директор проф. д-р Илчо Јованов, професор и декан на Факултетот за музичка уметност при Универзитетот „Гоце Делчев“, го поставува овогодинешниот избор на композиции во насока на современ фестивалски звук, со јасна почит кон македонскиот мелос, препознатливата емоција и песната што може да остане меѓу народот.

Според уметничкиот концепт, овогодинешните композиции треба да покажат дека македонската фолк музика може да звучи современо, со зачувана суштина, македонски дух, мелос и препознатлива емоција. Во тој спој меѓу традицијата и современиот музички израз, Фолк Фест Валандово ја потврдува својата улога како чувар на македонската песна и како сцена на која се создаваат нови рефрени за нови генерации.

На фестивалската сцена ќе настапат Софија Пуровска со „Мир што ме опива“, Дејан Николоски Чуле со „Слатки мали лаги“, Ивана Наумова Каранфилов со „Дојде време да се вратиш“, Стефан Илиќ од Србија со „Уште еднаш“, Габриела Новевска со „Да имав јас среќа“, групата Распеани Валандовчани со „Отвори Лидо рајски прозорец“, Лени Партикова со „Пуштај ме мајко“, Горан Тодороски со „Билјана“, Ивана Серафимовска со „Дишам повторно“, Горан Тодоровски со „Сонце да ме разбуди“, Ангела Влинтовска со „Вардар тече среде Скопје“, Нино Величковски со „Смислата на животот“, Василија Петрова со „Среќна со тебе“, Драган Даце Николовски со „Жено неверна“, Благица Калева со „Солзи немам“, Мишко Крстевски со „Калина“, Анета Љумаковска, Јане Динев и Анета Бенд со „После сѐ“, Благоја Грујовски со „Султана“, Смиља Митревска со „Љубовта нека царува“ и Христијан Божинов Кико со „Градче мое убаво“.

Овогодинешните композиции носат разновидност, силни мелодиски линии и потенцијал за нови македонски хитови. Фестивалската песна, во духот на Валандово, треба да има рефрен што се памети, емоција што допира до публиката и мелодија што може да продолжи да живее и по завршувањето на фестивалската вечер.

Еден од најзначајните моменти на втората фестивалска вечер ќе биде доделувањето на наградата за интерпретација „Никола Бадев“, една од најпрестижните награди на Фолк Фест Валандово. Наградата се доделува секоја година, а ова издание има посебна симболика. По повод 50 години од смртта на доајенот на македонската народна музика, признанието на сцената ќе го додели неговата ќерка, Роска Бадева.

Посебно признание на овогодинешното издание ќе ѝ биде доделено и на Блага Петреска, една од најпрепознатливите и најпочитувани интерпретаторки на македонската народна музика, која годинава е добитничка на наградата за животно дело. Со својот глас, сценска зрелост и децениска посветеност кон македонската песна, Петреска остави силен белег во музичката традиција, а нејзиното присуство на валандовската сцена има посебна симболика за фестивалот и публиката.

Организациската координација на изданието, со две фестивалски вечери, директен телевизиски пренос, предфестивалска програма, медиумска комуникација, голем број учесници и сериозна сценска поставеност, ја носи извршниот директор Горјан Стојановски, како дел од тимот што годинава го поставува фестивалот на повисоко продукциско и организациско ниво. Спојот на уметничката селекција, техничката реализација и организациската дисциплина му дава на ова издание поинаков интензитет и очекување.

Главни домаќини на фестивалската вечер ќе бидат Ели Танасковска и Зоран Ѓоргиев, две препознатливи телевизиски имиња кои ќе ја водат програмата во духот на фестивалската традиција и современата сценска презентација. Дел од овогодинешното издание ќе биде и Снеже Велков, која за првпат ќе биде дел од Фолк Фест Валандово како водител од „ред карпет“, носејќи дополнителна динамика, свежина и телевизиски ритам во претставувањето на фестивалската вечер, додека Дени Нунов ќе јавува од позади сцената.

Генерален покровител на Фолк Фест Валандово 2026 е Министерството за култура и туризам. Генерални спонзори на фестивалот се Бони Интерградба и Евроградба Инженеринг. Златен спонзор е Escape Travel Agency, а сребрен спонзор е Рентал Медија Груп Струмица. Спонзори на фестивалот се Клиниката „Жан Митрев“, Дим Комерц Валандово, Виена Петрол Јосифово и Конти Хидропласт Гевгелија.

Поддржувачи и помагатели на фестивалот се Империјал Тобако АД Валандово, Фук-Так Дојран, Фанси Корнер Валандово, Марјан Ринго ДООЕЛ Брајковци, Џови Компани, ВСГ Инвест ТИМ Гевгелија, ЕКОСТО ДОО Стојаково, ПУКЕТ Консалт Струмица, Сигал Струмица, Викмар Транспорт Удово, Еурогрил Јосифово, Винарија Вардарска Долина, Оскар М Струмица, Гарден Цвет Струмица и Вивитек Гевгелија. Водителите се облечени од Астибо и Фокабо.

Фолк Фест Валандово со децении создавал песни, градел имиња и оставал рефрени што се паметат со генерации. Оваа година фестивалот влегува во издание што ја претставува традицијата како жива, современа и силна, поставена со вистински луѓе, вистинска продукција и јасна почит кон песната.

На 26. и 27. мај, Валандово повторно станува место каде што македонската песна се слуша со внимание, се пее со срце и се носи со чувство на гордост.