Хрватска забрани енергетски пијалаци за помлади од 18 години

Хрватска забрани енергетски пијалаци за помлади од 18 години, откако Хрватскиот сабор ги изгласа измените на Законот за трговија со кои малолетниците повеќе нема да можат да купуваат вакви пијалаци во малопродажба, а трговците ќе мора да побараат доказ за возраст кога ќе проценат дека купувачот е малолетен.

Со новите измени, енергетските пијалаци влегуваат во истата заштитна логика како алкохолните пијалаци кога станува збор за продажба на лица под 18 години. Забраната се однесува на продажба во продавници, а правилото ќе важи и кај автоматизираните каси, каде што исто така треба да се обезбеди проверка на возраста.

Хрватските пратеници измените ги поддржаа едногласно. Законот, покрај забраната за енергетски пијалаци за малолетници, им дава и поголеми овластувања на единиците на локалната самоуправа да го ограничат времето во кое продавниците смеат да продаваат алкохолни пијалаци, доколку тоа е потребно за заштита на јавното здравје, јавниот ред и мир, културното наследство или животната средина.

Новите правила предвидуваат трговецот да ја одбие продажбата на алкохолни и енергетски пијалаци ако процени дека купувачот е помлад од 18 години, освен ако тој со важечки личен документ не докаже дека е полнолетен. Кај продажбата на алкохол преку интернет, пак, треба да се обезбеди проверка на полнолетноста преку хрватскиот систем е-Граѓани.

Зад забраната стои аргументот дека децата и младите треба да се заштитат од прекумерна изложеност на кофеин и други стимуланси. Хрватскиот завод за јавно здравје претходно предупредуваше дека енергетските пијалаци не се безопасна навика, особено кога се консумираат често, во големи количини или во комбинација со алкохол.

Податоците на ХЗЈЗ покажуваат дека дел од учениците во Хрватска консумираат енергетски пијалаци уште на 11, 13 и 15 години, а кај дел од нив се бележи и секојдневна употреба. Особено ризична е комбинацијата со алкохол, што здравствените институции ја посочуваат како дополнителна опасност за младите.

Со оваа одлука Хрватска го затвора просторот во кој енергетските пијалаци беа лесно достапни за малолетници, иако со години се предупредуваше дека нивната употреба кај децата не е само прашање на навика, туку и на јавно здравје.