Skip to content
Индонезија ја претстави пред јавноста првата џиновска панда родена во земјата, младенчето Рио, кое се смета за редок успех во меѓународните програми за зачувување на овој вид. Младенчето беше претставено во „Таман Сафари Индонезија“ во Богор, јужно од Џакарта, откако ветеринарните тимови потврдиле дека ги достигнало потребните физички и поведенски фази за контролирано појавување пред посетители.
Рио е роден на 27 ноември 2025 година, со тежина од само 200 грама. За неполни шест месеци пораснал во здраво машко младенче од околу 11 килограми, веќе се движи самостојно, активно комуницира со мајката Ху Чун и постепено почнува да јаде млади бамбусови изданоци.
Неговото целосно име е Сатрио Виратама, а прекарот Рио веќе стана препознатлив во индонезиските медиуми. Младенчето е потомок на пандите Ху Чун и Цаи Тао, кои во 2017 година пристигнаа во Индонезија како дел од десетгодишна програма за конзервациска соработка со Кина.
Раѓањето на Рио се смета за особено значајно бидејќи џиновските панди тешко се размножуваат во контролирани услови. Според Асошиејтед прес, неговото раѓање дошло по повеќе обиди за природно парење и вештачко оплодување, што дополнително ја нагласува сложеноста на програмите за зачувување на видот.
Од „Таман Сафари Индонезија“ наведуваат дека јавните појавувања на Рио ќе бидат постепени и строго контролирани, во согласност со меѓународните стандарди за благосостојба на животните. Според центарот, тој е единственото младенче од џиновска панда родено надвор од Кина во последните три години.
Џиновските панди остануваат еден од најпрепознатливите симболи на глобалните напори за заштита на загрозените видови. Во дивината живеат помалку од 1.900 единки, главно во кинеските провинции Сечуан, Шанси и Гансу, поради што секое успешно раѓање во меѓународна програма се смета за важен конзервациски резултат.
