Skip to content
Премиерот Христијан Мицкоски порача дека Владата нема да ја промени позицијата за уставните измени по пораките на претседателот на Европскиот совет, Антонио Кошта, дека тие остануваат услов за формален почеток на пристапните преговори со Европската Унија.
Мицкоски изјави дека „нема цена“ што би ја натерала Владата да влезе во процес без јасен и извесен крај.
Во реакцијата по посетата на Кошта, Мицкоски повтори дека Македонија останува на европскиот пат, но дека не прифаќа нови чекори без гаранции дека процесот нема повторно да биде блокиран со билатерални барања. Според него, државата не смее да влезе во „авантура“ во која нема јасна предвидливост и политичка сигурност.
Премиерот оцени дека прашањето не е само техничко исполнување на услов, туку доверба во процесот и во тоа дали Европската Унија може да обезбеди јасна рамка без нови идентитетски и билатерални условувања. Тој порача дека Владата има аргументи и дека процесот не треба да се води под притисок, туку со стратегија, план и визија.
Кошта, пак, од Скопје порача дека усвојувањето на договорените уставни измени останува единствениот начин за формално започнување на пристапните преговори. Тој нагласи дека она што било договорено во 2022 година треба да се испорача и дека, по тоа, процесот продолжува како нормален процес на проширување заснован на заслуги.
На прашањето дали Европскиот совет може да донесе заклучоци што би биле гаранција за Македонија во однос на билатералните теми, Кошта не даде директна потврда дека такви гаранции може да се добијат однапред.
Тој посочи дека Европскиот совет би можел да има услови за такви заклучоци откако Македонија ќе го исполни договореното од 2022 година.
Средбата уште еднаш ја потврди разликата меѓу позициите на Брисел и Скопје. Европската Унија инсистира дека уставните измени се следниот чекор за отворање на преговорите, додека Владата бара политичка и институционална сигурност дека по тој чекор нема да следуваат нови блокади.
Во фокусот останува внесувањето на Бугарите во Уставот, услов поврзан со преговарачката рамка со ЕУ. За Брисел, тоа е преземена обврска што треба да се исполни. За Владата, клучното прашање е дали исполнувањето на таа обврска ќе донесе реален почеток на преговорите или само нова фаза на неизвесност.
Мицкоски повика на обединување околу државните позиции, оценувајќи дека Македонија мора да настапи со единствена стратегија во однос на евроинтеграциите и спорот со Бугарија. Тој ја постави пораката како продолжување на владината линија: разговори со ЕУ да, но не и нови отстапки без гаранции.
