Тамара ја почнува новата ера во својата кариера со „Кукла жива“

Тамара Тодевска го објави новиот сингл „Драма квин“, прва песна од нејзиниот нов студиски албум „Кукла жива“, проект со кој пејачката најавува нова музичка и визуелна фаза во својата кариера.

Песната е авторски потпишана од Коста Петров и Тамара Тодевска, а аранжманот е на Емин Џијан. Во снимањето учествувале повеќе од 50 музичари и хор, што му дава на проектот поголем продукциски обем и звук заснован на живи инструменти.

Спотот за „Драма квин“ е снимен во студиото „Takat“, во режија на Мартин Трајановски, со кого Тодевска соработувала и на претходни проекти. Видеото е дел од поширокиот концепт на „Кукла жива“, албум со 10 нови песни, најавен како прв визуелен албум создаден во Македонија.

Тодевска вели дека новата песна е само дел од материјалот што следува и дека албумот е создаван со музичари со кои дели долгогодишна професионална и креативна врска.

„Ова е само мал дел од она што следува – албум на кој работат некои од најдобрите музичари во Македонија, комплетно сниман со живи инструменти и песни кои се инспирирани од различни периоди на мојот живот. „Драма квин“ е брза и динамична песна, а навистина уживавме во текот на снимањето на визуелниот дел“, посочува Тамара.

Таа додава дека на видеото работела со луѓе со кои соработувала и претходно, дел од нив и како повеќегодишни соработници и пријатели, што го олеснило креативниот процес и визуелната насока на проектот.