Skip to content
Иран го повика Обединетите нации да преземат мерки поради, како што тврди Техеран, повторено кршење на примирјето од страна на САД, откако американските сили извршија напади врз радарски и крајбрежни надзорни објекти во јужниот дел на земјата.
Иранското Министерство за надворешни работи соопшти дека нападите врз објекти во регионот Сирик и на островот Кешм претставуваат „јасно кршење“ на примирјето од 8 април и повреда на суверенитетот и територијалниот интегритет на Иран. Според Техеран, станува збор за објекти што се користеле за заштита на границите и за безбедност на меѓународните поморски рути.
САД, пак, тврдат дека нападите биле изведени како одговор на ирански беспилотни летала и ракети насочени кон Ормускиот Теснец и кон земји од Заливот каде што има американско воено присуство. Американската Централна команда соопшти дека биле соборени ирански дронови и ракети, а потоа биле погодени ирански надзорни позиции со цел да се спречат нови напади.
Иранската револуционерна гарда соопшти дека како одговор нападнала американски бази во Кувајт и Бахреин. Според американската војска, шест од седум ирански ракети биле пресретнати, а една не стигнала до целта. Кувајт и Бахреин пријавија безбедносни мерки и активирање на системи за воздушна тревога, без извештаи за американски жртви.
Новата размена на удари дополнително го оптоварува кревкото примирје и ги усложнува дипломатските напори за смирување на конфликтот. Според меѓународните агенции, Пакистан продолжува со посреднички напори, додека прашањата за Ормускиот Теснец, санкциите, иранските приходи од нафта и безбедносните гаранции остануваат меѓу клучните точки во преговорите.
Ормускиот Теснец и натаму е една од најчувствителните точки во кризата, бидејќи низ него минува значаен дел од светскиот транспорт на нафта. Секоја нова воена ескалација во тој регион има потенцијал да предизвика пошироки последици врз енергетските пазари и врз безбедноста во Заливот.
