Skip to content
Иранската Револуционерна гарда соопшти дека извршила ракетни и дронски напади врз американски воени бази во Јордан, Кувајт и Бахреин, како одговор на американските удари врз ирански цели во близина на Ормускиот теснец. Според Reuters, станува збор за една од најсериозните размени на удари меѓу Вашингтон и Техеран по кревкото примирје постигнато во април.
Американската војска претходно соопшти дека извршила серија „самоодбранбени“ напади врз ирански системи за противвоздушна одбрана, контролни станици и радари за надзор во реонот на Ормускиот теснец. Нападите следеа откако американски хеликоптер „Апачи“ беше соборен во близина на теснецот, при што двајцата членови на екипажот биле спасени и се во стабилна состојба.
Иран, според објавите на Револуционерната гарда, гаѓал американски позиции во Бахреин, Кувајт и Јордан. Во Јордан цел биле четири локации во базата Ал Азрак, меѓу кои, според иранските тврдења, хангари за авиони Ф-35 и команден центар. Јорданската армија соопшти дека пресретнала и соборила пет ракети испукани од Иран кон базата и дека нема повредени ниту материјална штета.
Во Кувајт, армијата соопшти дека системите за противвоздушна одбрана дејствувале против непријателски воздушни цели, додека во Бахреин властите тврдат дека иранските напади биле одбиени. Американски официјален претставник, цитиран од Reuters, изјави дека првичните проценки покажуваат оти речиси сите ракети и дронови биле пресретнати и дека засега нема информации за повредени американски војници или за штета врз американски објекти.
Техеран тврди дека нападите се изведени како самоодбрана и предупреди дека земјите од Заливот ќе се соочат со последици доколку нивната територија се користи за американски или израелски операции против Иран. Вашингтон, пак, ги опиша своите удари како пропорционален одговор на нападите врз американските сили и врз меѓународните трговски бродови во регионот.
Ескалацијата повторно го става Ормускиот теснец во центарот на глобалната криза. Преку оваа морска рута минува значаен дел од светската трговија со нафта и течен природен гас, па секое продолжување на конфликтот може да предизвика нов раст на цените на енергенсите. По последните напади, цените на нафтата во азиското тргување пораснале за околу еден процент.
Случувањата се развиваат брзо, а дел од тврдењата на страните не се независно потврдени. Reuters наведува дека не може веднаш да ги верификува сите информации од бојното поле, додека повеќе регионални власти соопштуваат дека нивните системи за одбрана биле активирани по иранските напади.
