Skip to content
Светското првенство во фудбал 2026 ќе биде најголемиот Мундијал во историјата. За првпат турнирот ќе се игра со 48 репрезентации, 104 натпревари и три земји-домаќини – САД, Канада и Мексико. Од 11 јуни до 19 јули, фудбалот ќе се пресели низ 16 градови во Северна Америка, на стадиони што се движат од историски симболи до ултрамодерни спортски арени вредни милијарди долари.
ФИФА го замисли Мундијалот 2026 како турнир со невиден обем. Натпреварите ќе се играат во четири временски зони, на локации оддалечени илјадници километри една од друга, што ќе биде голем логистички предизвик и за репрезентациите и за навивачите. САД ќе бидат главниот домаќин со 11 стадиони, Мексико ќе има три града-домаќини, а Канада два.
Турнирот ќе почне таму каде што фудбалската историја веќе има оставено длабока трага – на легендарниот „Естадио Ацтека“ во Мексико Сити. Овој стадион беше домаќин на финалињата на Светските првенства во 1970 и 1986 година, а во 2026 ќе стане првиот стадион во светот што бил дел од три машки Мундијали. Токму таму ќе се одигра отворањето на турнирот.
Финалето, пак, ќе се игра на „MetLife Stadium“ во Ист Радерфорд, Њу Џерси, кој за потребите на ФИФА ќе го носи името „New York New Jersey Stadium“. Иако не се наоѓа во самиот Њујорк, стадионот е на само неколку километри од Менхетен и ќе биде сцената на најголемиот натпревар во светскиот фудбал на 19 јули 2026 година.
Еден од највпечатливите стадиони ќе биде „SoFi Stadium“ во Лос Анџелес, кој важи за најскапиот стадион изграден досега. Објектот во Инглвуд е познат по футуристичкиот изглед, огромниот кров и спектакуларниот видео-екран што виси над теренот. За потребите на Мундијалот, како и на повеќе американски стадиони, ќе биде поставена привремена природна тревна подлога за да се исполнат стандардите на ФИФА.
Далас, со „AT&T Stadium“, ќе биде една од најважните точки на турнирот. Стадионот на „Dallas Cowboys“ ќе угости најмногу натпревари на Светското првенство – вкупно девет, меѓу кои и полуфинале. Станува збор за еден од најголемите и најпрепознатливите спортски објекти во САД, со огромен капацитет и карактеристичен затворен покрив.
Атланта ќе биде уште еден клучен град-домаќин. „Mercedes-Benz Stadium“, кој за време на турнирот ќе користи генеричко име поради правилата на ФИФА за спонзорски називи, ќе биде домаќин на осум натпревари, меѓу кои и полуфинале. Стадионот е познат по кровот што се отвора како бленда на фотоапарат и по големиот кружен видео-бим.
Мексико ќе има силна фудбалска симболика на овој турнир. Покрај Мексико Сити, натпревари ќе се играат и во Гвадалахара и Монтереј. „Estadio Akron“ во Гвадалахара е архитектонски препознатлив објект изграден како стадион што визуелно потсетува на вулкан, додека „Estadio BBVA“ во Монтереј нуди еден од најубавите погледи во светскиот фудбал, со планински масив зад трибините.
Канада ќе биде претставена со Ванкувер и Торонто. „BC Place“ во Ванкувер ќе понуди посвежи услови во споредба со жешките градови на југот, а „BMO Field“ во Торонто ќе биде местото каде што канадската репрезентација ќе го почне својот настап на домашен терен.
Временските услови можат да бидат важен фактор на турнирот. Во Мајами, Монтереј, Хјустон и Далас се очекуваат високи температури и влажност, додека Ванкувер и Сиетл би требало да понудат попријатна клима. Во Мексико Сити и Гвадалахара, пак, надморската височина може да биде дополнителен предизвик за репрезентациите што не се навикнати на поредок воздух.
Дел од американските стадиони во секојдневна употреба користат вештачка трева, но за Светското првенство ќе бидат поставени природни подлоги. Тоа е особено важно за стадионите во Атланта, Бостон, Далас, Хјустон, Лос Анџелес, Њујорк/Њу Џерси, Сиетл и Ванкувер. По критиките за привремените терени на претходни натпреварувања, ФИФА најавува дека сите услови ќе бидат усогласени со стандардите за најголемиот фудбалски турнир.
Списокот на домаќини ја покажува големината на турнирот: Ванкувер, Торонто, Мексико Сити, Гвадалахара, Монтереј, Сиетл, Сан Франциско Беј Ареа, Лос Анџелес, Хјустон, Далас, Канзас Сити, Атланта, Мајами, Бостон, Филаделфија и Њујорк/Њу Џерси.
Мундијалот 2026 нема да биде само фудбалско натпреварување, туку и тест за организација на турнир со досега невидена географија, број на учесници и број на натпревари. Од митската „Ацтека“ до финалето пред Њујорк, Светското првенство ќе биде патување низ различни клими, култури, архитектури и фудбалски традиции.
