Skip to content
Американскиот претседател Доналд Трамп упати невообичаено остра јавна критика до израелскиот премиер Бенјамин Нетанјаху поради начинот на кој Израел ги спроведува воените операции против Хезболах во Либан.
Говорејќи пред новинарите на самитот на Г7 во Франција, Трамп оцени дека израелските напади предизвикуваат преголем број жртви и дека не е оправдано да се уриваат цели станбени објекти при потрага по припадници на Хезболах.
„Премногу луѓе се убиени. Не мора да урнете цела станбена зграда секогаш кога барате некого“, изјави Трамп, нагласувајќи дека сите лица што живеат во погодените објекти не се членови на либанското движење.
Тој порача дека Нетанјаху треба да постапува поодговорно во Либан, иако истовремено нагласи дека со израелскиот премиер има добри односи. Трамп оцени и дека борбите против Хезболах траат предолго.
Изјавата претставува редок пример на директна јавна критика од американски претседател кон израелските воени тактики. Вашингтон традиционално е најважниот воен и дипломатски сојузник на Израел, а Трамп повеќепати се претставуваше како еден од најголемите поддржувачи на израелската држава.
Неговите критики доаѓаат во период на зголемени несогласувања со Нетанјаху околу продолжувањето на израелските напади во Либан. Според „Ројтерс“, Трамп е незадоволен бидејќи нападите врз Бејрут можеле да ги загрозат американските напори за постигнување договор со Иран.
Прекинот на борбите во Либан е едно од клучните барања поврзани со пошироките преговори за смирување на регионалниот конфликт. Израел, сепак, продолжува да тврди дека операциите се насочени кон инфраструктурата и борците на Хезболах, кои, според израелските власти, дејствуваат од населени подрачја.
Во конфликтот што повторно се прошири во Либан на 2 март, до 14 јуни загинале најмалку 3.783 лица, а 11.699 биле повредени, според податоците на либанското Министерство за здравство. Меѓу загинатите се 247 деца, 363 жени и 133 здравствени работници, но официјалната статистика не прави целосна разлика меѓу цивили и борци.
Повеќе од 1,2 милиони луѓе биле принудени да ги напуштат своите домови, додека над 68.000 станбени единици биле оштетени или целосно уништени. Најголемиот дел од разурнувањата се регистрирани во јужен Либан, Бејрут и јужните предградија на главниот град.
И покрај острите зборови на Трамп, засега нема најава дека неговата критика ќе биде проследена со конкретна промена на американската политика кон Израел. Од Белата куќа повторија дека претседателот има силни односи со Нетанјаху и дека Израел останува важен партнер на Соединетите Американски Држави.
