Skip to content
Тетово ги враќа старите улици, откако Уставниот суд, според ФБ-статус на Даријан Сотировски, ја прифатил иницијативата за оценување на уставноста и законитоста на одлуката на Советот на Општина Тетово од 24 април 2007 година и ја укинал одлуката со која биле променети имињата на повеќе улици во градот. Иницијативата, како што наведува Сотировски, била поднесена на 11 февруари 2025 година заедно со Сојузот на борците од НОБ Тетово.
Во статусот Сотировски наведува дека со одлуката на Уставниот суд „заминаа во историја наметнатите незаконски имиња на улиците во Тетово“. Тој ги поздрави граѓаните кои, како што пишува, во моментов шетаат по плоштадот и булеварот „Маршал Тито“, пазаруваат на улицата „Радован Цониќ“, возат долж улицата „Иво Рибар Лола“ или чекаат преглед на улицата „29 Ноември“.
Според него, спорната одлука од 2007 година била донесена со гласовите на советниците од сите тогаш застапени политички партии во Советот на Општина Тетово. Сотировски оценува дека со неа, кршејќи го законот, биле заменети имињата на македонските херои и јунаците од светската антифашистичка коалиција.
Во својата реакција тој случајот го поставува и во поширок општествен контекст, наведувајќи дека таквата одлука рефлектирала непочитување кон Уставот и кон асномскиот антифашистички темел на државата.
Сотировски пишува дека голем дел од она што ѝ се случувало на државата е резултат на „колективна попустливост и предавање“. Тој повикува на поголема поддршка за локалните иницијативи и организации, посочувајќи дека Сојузот на борците од НОБ Тетово, според него, во изминатите години направил повеќе за Тетово од институциите и партиите заедно.
