Skip to content
Австралија го потврди првиот случај на високопатогениот птичји грип Х5 на своето копно, откако вирусот беше откриен кај дива птица преселница во оддалечен дел на Западна Австралија.
Заразената птица, кафеав поморник, била пронајдена болна на 14 јуни во областа Кејп Ле Гранд, источно од градот Есперанс. Подоцнежните лабораториски анализи во Австралискиот центар за подготвеност од болести го потврдиле присуството на високопатогениот вирус.
Австралија досега беше единствениот континент без потврдено присуство на опасниот сој на своето копно, поради што откритието предизвика засилена тревога кај ветеринарните, земјоделските и службите за заштита на дивиот свет.
Во истиот регион била пронајдена и болна џиновска бурница, која исто така дала позитивен резултат на птичји грип во државната лабораторија. Дополнителните анализи треба да утврдат за кој точен сој станува збор.
Австралиските власти нагласуваат дека засега нема потврдени случаи кај домашната живина и дека вирусот не навлегол во земјоделското производство. Не се забележани ниту масовни угинувања на птици или други животни во областа.
Премиерот Ентони Албанезе оцени дека појавата е загрижувачка и порача дека државата ќе ги преземе сите потребни мерки за да го ограничи можниот ризик од ширење.
Активирани се тимовите за итен одговор, а ќе биде засилен надзорот врз дивите птици, фармите за живина, ветеринарните установи и крајбрежните области. Надлежните ги повикаа граѓаните да не допираат болни или угинати птици и морски цицачи, туку веднаш да ги известат службите.
Х5 птичјиот грип веќе беше потврден кон крајот на 2025 година на островот Херд, оддалечена австралиска територија во јужниот дел на Индискиот Океан. Таму вирусот предизвикал масовно угинување на диви животни, меѓу кои повеќе од 13.000 младенчиња на јужни морски слонови, како и голем број пингвини и други птици.
Најголемата опасност во Австралија во моментов е можниот удар врз уникатниот див свет и врз живинарската индустрија. Вирусот во други делови од светот доведе до уништување на стотици милиони птици, нарушување на производството и раст на цените на јајцата и месото.
Птичјиот грип најчесто се шири меѓу дивите и домашните птици, но може да зарази и цицачи. Пренесувањето на луѓе е ретко и обично се поврзува со директен и близок контакт со заразени животни.
Австралискиот центар за контрола на болести оценува дека ризикот за пошироката јавност останува низок. Надлежните посочуваат и дека правилно подготвеното пилешко месо и јајцата не претставуваат ризик за безбедноста на храната.
Појавата на вирусот кај само една дива птица не значи дека во Австралија веќе има широко распространета епидемија. Сепак, случајот покажува дека природната географска изолираност повеќе не е доволна за да ја заштити земјата од вирус кој со години се шири преку миграциските патишта на дивите птици
