Skip to content
Јавното обвинителство за организиран криминал на Србија побарало од Службата за борба против организиран криминал (СБПОК) да ги провери наводите од кривичните пријави против директорот на Безбедносно-информативната агенција (БИА), Владимир Орлиќ, министерот за правда Ненад Вујиќ и повеќе други функционери и службени лица, поради сомнежи за кривични дела поврзани со изборните права.
Обвинителството соопшти дека формирало два предмета по кривични пријави поднесени од адвокатот Иван Ниниќ.
Првата пријава се однесува на директорот на БИА, Владимир Орлиќ, и повеќе службеници на агенцијата, поради сомнежи за злоупотреба на службената положба, повреда на правото на гласање и принуда.
На 4 ноември Обвинителството побарало од СБПОК да ги провери наводите и да спроведе разговори со пријавените лица.
Втората кривична пријава го опфаќа министерот за правда Ненад Вујиќ, директорот на Управата за извршување кривични санкции Миле Јандриќ, специјалната советничка на министерот Милица Радоњиќ и уште 60 поименично наведени лица, меѓу кои управници и службеници во затворски установи.
Во пријавата се споменуваат и неидентификувани високи функционери, претставници и активисти на владејачката Српска напредна странка.
Сомнежите опфаќаат здружување за вршење кривични дела, злоупотреба на службената положба, трговија со влијание, давање и примање поткуп во врска со гласање, незаконско собирање лични податоци и дискриминација.
Случајот доаѓа во период кога работата на српската безбедносна агенција е предмет на дополнителни обвинувања. На 3 ноември двајца поранешни припадници на БИА поднесоа посебна кривична пријава против Орлиќ и други раководни лица, поради сомнежи за незаконски надзор врз студенти, професори и активисти.
Засега нема официјална информација дека лицата опфатени со двете пријави на адвокатот Ниниќ се веќе испитани. Обвинителството е во фаза на проверка на наводите, а поднесувањето кривична пријава не значи дека е утврдена кривична одговорност.
