Пронајдени остатоците од товарниот „боинг 737“ кај Карачи, потрагата по петчлениот екипаж продолжува

Пакистанските спасувачки служби ги пронајдоа остатоците од товарен авион „боинг 737“ што исчезна над Арапското Море додека летал кон Карачи, а потрагата по петтемина членови на екипажот сè уште трае. Авионот, управуван од компанијата K2 Airways, изгубил контакт со контролата на летање откако пилотите пријавиле проблем со навигацискиот систем, по што исчезнал од радарите. 

Според пакистанските власти, остатоците од авионот биле пронајдени околу 53 наутички милји јужно од пристаништето Ормара, недалеку од Карачи. Во спасувачката операција се вклучени пакистанската морнарица, крајбрежната стража и повеќе државни служби, кои продолжуваат со пребарување на морето во обид да го пронајдат екипажот. 

Станува збор за 27 години стар товарен „боинг 737“, кој полетал од Шарџа во Обединетите Арапски Емирати кон Карачи. Податоците од системите за следење на летови покажуваат дека непосредно пред исчезнувањето авионот нагло ја менувал висината, а потоа преминал во стрмен пад. Истражителите засега не ја утврдиле причината за несреќата. 

Компанијата K2 Airways соопшти дека целосно соработува со истражните органи, додека пакистанскиот премиер Шехбаз Шариф изрази сочувство до семејствата на членовите на екипажот и нареди да се интензивира спасувачката операција. 

Ова е првата голема воздухопловна несреќа во Пакистан по трагедијата од 2020 година, кога патнички авион на Pakistan International Airlines се урна во населено место во близина на аеродромот во Карачи. Новата несреќа повторно ги отвори прашањата за безбедноста во цивилното воздухопловство и причините што доведуваат до вакви инциденти.