Која е Јудит Полгар, шахистката која што Петер Маѓар може да ја предложи за претседателка на Унгарија?

Најсилната шахистка во историјата, Јудит Полгар, може да стане следната претседателка на Унгарија, откако премиерот Петер Маѓар објави дека ќе разговара со неа и ќе ѝ понуди да ја прифати кандидатурата. Владејачката партија ТИСА веќе едногласно ја поддржа иницијативата, но Полгар сè уште јавно не кажала дали е подготвена да влезе во политиката.

Полгар е родена во 1976 година во Будимпешта и уште како дете стана дел од необичниот образовен експеримент на нејзиниот татко Ласло Полгар. Тој верувал дека со рана и насочена работа може да се создаде врвен талент. Јудит и нејзините сестри Сузан и Софија израснале во средина во која шахот бил секојдневие, а не само игра.

На 15 години и четири месеци Јудит ја освои титулата велемајстор и го собори тогашниот рекорд на Боби Фишер. Наместо да настапува само на женски натпревари, таа избра да се натпреварува на отворените турнири со најдобрите шахисти во светот. Стана единствената жена што влегла меѓу десетте најдобри на светската листа, стигнувајќи до осмото место и рејтинг од 2.735 поени.

Во кариерата победувала светски шампиони како Гари Каспаров, Анатолиј Карпов, Вишванатан Ананд, Борис Спаски и Магнус Карлсен. Нејзините резултати ја направија симбол на борбата против машката доминација во професионалниот шах. Таа никогаш не сакала да биде оценувана само како најдобра жена, туку како шахистка што може рамноправно да игра со светската елита.

По повлекувањето од активното натпреварување во 2014 година, Полгар се посвети на образованието и промовирањето на шахот меѓу децата. Таа основа фондација, разви сопствен образовен метод и организира глобален шаховски фестивал. Не е позната како членка или активистка на некоја политичка партија, што е една од причините зошто Маѓар ја претставува како можна фигура на национално единство.

Идејата доаѓа во период на големи политички промени во Унгарија. Партијата ТИСА на Маѓар ја презеде власта по 16 години владеење на Виктор Орбан, а парламентот усвои уставни измени со кои предвреме завршува мандатот на претседателот Тамаш Шуљок. Новата власт тврди дека сака да ги промени институциите поврзани со претходната влада.

Унгарскиот претседател има претежно церемонијална функција, но ги потпишува законите и може да побара нивна проверка пред Уставниот суд. Претседателот не се избира директно од граѓаните, туку во парламентот, каде ТИСА има доволно мнозинство за да го обезбеди изборот на својот кандидат.

За Петер Маѓар, Полгар претставува јавна личност со меѓународен углед, личен интегритет и препознатливост надвор од партиските поделби. Дали шаховската легенда ќе ја прифати понудата и ќе ја замени таблата со претседателската палата треба да стане појасно по нивниот најавен разговор.