Skip to content
Украинскиот претседател Володимир Зеленски со три одделни укази ги разреши амбасадорите на Украина во Хрватска, Албанија и Црна Гора, во ист ден менувајќи тројца дипломатски претставници на Киев во регионот. Причините за смените засега не се наведени во објавените укази.
Од функцијата амбасадор во Хрватска е разрешен Васил Кирилич со указ бр. 709/2026. Володимир Шкуров, кој ја претставуваше Украина во Албанија од април 2020 година, е разрешен со указ бр. 710/2026, додека Олег Герасименко повеќе нема да биде амбасадор во Црна Гора по указот бр. 711/2026.
Киев засега не ги соопшти имињата на нивните наследници, ниту наведе дали трите смени се дел од поширока реорганизација на украинската дипломатска мрежа.
Потегот следува само неколку дена откако Зеленски, на 3 август, ја разреши и украинската амбасадорка во САД, Олга Стефанишина.
Смените во трите балкански земји доаѓаат во период кога Украина ги интензивира дипломатските контакти со државите од Југоисточна Европа, особено околу безбедносната соработка, европската интеграција и поддршката за Киев во војната со Русија.
