Skip to content
Романија утрово почна контролирано да го исклучува и вториот реактор во нуклеарната централа „Чернавода“, откако рекордно нискиот водостој на Дунав повеќе не обезбедува услови за негово нормално работење. Првиот реактор беше исклучен уште на крајот од јули поради истиот проблем.
Државната компанија „Нуклеарелектрика“ соопшти дека процесот почнал рано утрово и дека реакторот треба целосно да биде исклучен од националниот електроенергетски систем околу 11 часот по локално време. Одлуката е донесена поради континуираниот пад на нивото и протокот на Дунав.
Исклучувањето се спроведува контролирано и според процедурите за нуклеарна безбедност. Проблемот не е дефект во реакторите, туку недостигот од вода потребна за системите за ладење и кондензација.
„Чернавода“ има два реактора со моќност од околу 700 мегавати секој и во нормални услови обезбедува приближно една петтина од електричната енергија во Романија. Со исклучувањето и на вториот реактор, земјата останува без производство од својата единствена нуклеарна централа додека трае екстремната суша.
Романските власти во изминатите недели презедоа невообичаени интервенции на Дунав во обид да обезбедат доволно вода за централата. Беа отстранувани подводни пречки, се вршеше продлабочување на коритото, а беа потопувани и баржи за да се пренасочи дел од водата кон системот за ладење. Мерките успеаја само привремено да го продолжат работењето.
За да го надомести недостигот од нуклеарно производство, Романија активираше и термоцентрала на лигнит со моќност од 330 мегавати, а дополнителна струја обезбедува преку хидро и ветерни капацитети и увоз од соседните системи. Властите ги повикаа граѓаните да ја намалат потрошувачката во вечерните часови.
Ниското ниво на Дунав создава сериозни проблеми и во остатокот од регионот. Унгарската нуклеарна централа „Пакш“ исто така е погодена од историски нискиот водостој, поради што Будимпешта презема итни инженерски интервенции за да обезбеди вода за ладење на реакторите.
