Skip to content
Бугарските власти вратија во Македонија пратка од 11,6 тони свежи пиперки, откако лабораториските анализи покажале присуство на пестицидот форметанат над дозволеното ниво. Пратката не била пуштена во продажба на бугарскиот пазар и, по налог на Бугарската агенција за безбедност на храната, била вратена во земјата на потекло со содејство на Царинската агенција.
Пиперките пристигнале во Бугарија од Северна Македонија преку граничниот премин Златарево и биле наменети за трговски оператор во Петрич. Токму таму пратката била задржана додека се чекале резултатите од лабораториското испитување.
Целото количество било ставено под официјална забрана за промет и се чувало во ладилна комора кај примачот. Дури откако анализата покажала дека остатоците од форметанат се над дозволените нивоа, бугарската Агенција за безбедност на храната наредила пиперките да му бидат вратени на доставувачот.
Тоа значи дека спорните 11,6 тони не стигнале до продавници, пазари или други продажни места во Бугарија.
Бугарските институции засега не соопштуваат од кој дел на Македонија потекнуваат пиперките. Во официјалното известување е наведена само земјата на потекло, Република Северна Македонија. Не се објавени името на македонскиот производител или извозник, местото каде што се произведени пиперките, ниту идентитетот на фирмата што ја испратила пратката.
Пратката била откриена во рамките на засилениот надзор што Бугарската агенција за безбедност на храната го спроведува на увезеното овошје и зеленчук од почетокот на август.
До објавувањето на информацијата биле лабораториски испитани 35 примероци свеж зеленчук. Од нив, 21 биле земени на преминот Златарево, а 14 на Ѓуешево. Вкупно 22 примероци биле од пиперки, а 13 од домати. Проверуваните пратки потекнувале од Македонија, Косово и Албанија.
Од 3 август бугарската Агенција за безбедност на храната спроведува и тематски контроли заедно со Комисијата за стокови берзи и пазари, даночната администрација и Министерството за внатрешни работи. Проверките се насочени кон домати, пиперки, праски и лубеници, како на граничните премини, така и во внатрешноста на земјата.
