Skip to content
Руската армија во јули претрпела најголеми месечни загуби од почетокот на 2026 година, соопшти украинскиот Генералштаб. Според Киев, во текот на месецот од борбена употреба биле исфрлени 42.860 руски војници, бројка во која се вклучуваат загинати и ранети.
Тоа е значително повеќе од претходните месеци. Украинските податоци покажуваат 31.710 руски загуби во јануари, 26.090 во февруари, 31.960 во март, 32.980 во април, 33.760 во мај и 39.290 во јуни. Јули со 42.860 е најтешкиот месец за руските сили оваа година според украинската статистика.
Високите загуби доаѓаат во период кога Москва се соочува и со сè поголем притисок да обезбеди нови војници за фронтот. „Гардијан“ објави дека руските регрутери се потешко ги исполнуваат квотите, додека Кремљ и натаму настојува да избегне нова голема мобилизација како онаа од 2022 година.
Украинскиот Генералштаб на 17 август ги процени вкупните руски загуби од почетокот на целосната инвазија на околу 1,47 милиони лица. Оваа бројка не значи 1,47 милиони загинати, туку претставува украинска проценка за вкупните лични загуби на руските сили.
Сосема поинаква методологија користат рускиот независен портал „Медиазона“ и рускиот сервис на Би-Би-Си. Тие до 13 август по име потврдиле 239.354 загинати руски војници од почетокот на инвазијата. Меѓу нив има 87.749 доброволци, 26.416 регрутирани затвореници, 19.778 мобилизирани лица и 7.530 офицери.
„Медиазона“ нагласува дека списокот не е целосен бидејќи се заснова само на јавно проверливи извори, како некролози, објави на семејства, локални медиуми и информации од регионалните власти. Затоа бројот на реално загинати е поголем од бројот на потврдени имиња.
