Skip to content
СПЦ повторно ја преименува МПЦ во својата официјална комуникација, откако во информација за меѓународна конференција одржана на 4 септември во манастирот Манасија го употреби називот „Православна Охридска Архиепископија, Македонска Православна Црква“, односно ПОА МПЦ.
Спорната формулација се појавила во текст објавен на официјалната интернет страница на Српската православна црква. Во него се наведува дека поздравното обраќање на архиепископот охридски и македонски г. г. Стефан го пренел епископот хераклејски Климент, претставен како секретар на Синодот на „Православната Охридска Архиепископија, Македонска Православна Црква“.
Официјалното име на црквата е Македонска православна црква, Охридска архиепископија, со кратенка МПЦ ОА. Во формулацијата на СПЦ не е променет само редоследот на зборовите, туку е создадена и кратенката ПОА МПЦ.
Токму кратенката ПОА го прави случајот особено чувствителен. Со неа до 2023 година се означуваше Православната охридска архиепископија, црковната структура предводена од Јован Вранишковски, која беше под јурисдикција на СПЦ.
Поранешната ПОА во 2023 година се интегрираше во МПЦ ОА, а нејзините архијереи беа примени во канонската јурисдикција на Македонската православна црква. Поради тоа, повторното појавување на истата кратенка, сега поврзана со МПЦ, отвора прашање дали станува збор за обична редакциска грешка или за намерно воведување поинаква терминологија.
Ова не е првпат СПЦ да ја користи формулацијата „Православна Охридска Архиепископија, Македонска Православна Црква“. Истиот назив се појавувал и во претходни официјални информации на српската црква, меѓу другото при претставувањето македонски архијереи на црковни настани во Србија.
Сепак, комуникацијата на СПЦ не е целосно доследна. Во документите и објавите поврзани со доделувањето на томосот во 2022 година беше употребувано името Македонска православна црква, Охридска архиепископија, истото име што го користи и самата МПЦ ОА.
Во најновата објава нема објаснување зошто е употребен називот ПОА МПЦ, ниту се посочува дека е донесена формална одлука за промена на името. Останува отворено дали формулацијата ќе продолжи да се појавува во официјалните текстови на СПЦ.
