Skip to content
Најмалку 11 лица загинаа, а три се тешко ранети откако тројца вооружени мажи упаднаа на домашна забава и отворија оган врз гостите во местото КваМакута, во близина на градот Дурбан во Јужноафриканската Република, соопштија локалните полициски власти. Случајот ја шокираше јавноста поради бруталноста на нападот, при што полицијата потврди дека меѓу смртно настраданите има и бремена жена.
Напаѓачите влегле ненадејно во приватниот објект и без предупредување почнале да пукаат кон присутните, по што веднаш побегнале од местото на настанот. Десет лица починале на самото место пред пристигнувањето на итните служби, додека четири лица биле префрлени во болница во критична состојба, каде што едно од нив им подлегнало на повредите.
Јужноафриканската полициска служба (SAPS) започна опсежна потрага по сторителите, но досега нема уапсени осомничени за масовното убиство. Во официјалното полициско соопштение се наведува дека дел од присутните на забавата веќе им биле познати на безбедносните органи преку претходни истраги поврзани со организиран криминал, што го отвора сомнежот дека станува збор за планиран и насочен напад.
Иако официјалниот мотив сè уште не е потврден, истражителите не ја исклучуваат можноста за судир меѓу ривалски банди кои дејствуваат во регионот Квазулу-Натал.
„Иако мотивот за пукањето сè уште не можеме да го потврдиме, не ја исклучуваме можноста дека станува збор за конфликт меѓу ривалски групи“, соопшти полицијата.
Јужноафриканската Република со години се соочува со една од највисоките стапки на вооружен криминал во светот, каде масовните пресметки со огнено оружје сè почесто однесуваат цивилни жртви во станбените населби.
