Skip to content
Финска и Шведска за првпат спроведоа заедничка оперативна мисија за пресретнување и идентификација на руски воени авиони над Финскиот Залив.
Финските и шведските борбени авиони од силите за брза реакција биле кренати во воздух во четвртокот, 24 септември, откако била забележана група руски воени летала во меѓународен воздушен простор.
Според финските воздухопловни сили, руската формација вклучувала транспортен авион Ту-134, како и борбени авиони МиГ-31 и Су-30. Леталата биле пресретнати и идентификувани над Финскиот Залив.
Финските воздухопловни сили соопштија дека ова е прва заедничка оперативна мисија за идентификација што ја спровеле Финска и Шведска.
Шведскиот премиер Улф Кристерсон по операцијата изјави дека Балтичкото Море „никогаш не било поранливо“, но дека истовремено „никогаш не било подобро заштитено“.
Инцидентот доаѓа во период на засилена воена активност во регионот на Балтичкото Море. Финска и Шведска, кои по руската инвазија врз Украина се откажаа од долгогодишната воена неутралност и станаа членки на НАТО, сè почесто учествуваат во заеднички мисии за надзор на воздушниот простор.
Шведските воздухопловни сили и претходно оваа година во повеќе наврати кревале ловци JAS 39 Gripen поради руски воени авиони во близина на шведскиот воздушен простор. Во јуни беа пресретнати руски Су-24 и Су-34 над Балтичкото Море, при што шведскиот воздушен простор не бил нарушен.
Новата заедничка операција се случи истиот ден кога данската разузнавачка служба предупреди дека ризикот од руска воена активност против земјите на НАТО е зголемен, иако директна инвазија ја оценува како малку веројатна.
