Skip to content
Само неколку дена откако Христијан Мицкоски го прифати советот на Урсула фон дер Лајен да се отвори директен разговор со Софија, премиерот веќе ги спушти очекувањата од таа средба речиси до нула.
Додека Тимчо Муцунски чека официјален одговор за средба со бугарската министерка Велислава Петрова-Чамова, Мицкоски денеска изјави дека „не очекува ништо“ и дека најмногу очекува неформален разговор „пул а сајд“ – или, како што самиот го нарече, средба „на коњопој“.
Така, уште пред министрите да седнат на иста маса, премиерот јавно ја намали политичката тежина на разговорот.
Од „да почнеме да го движиме процесот“ до „не очекувам ништо“
На 2 октомври по средбата со Фон дер Лајен пораката беше поинаква.
Претседателката на Европската комисија предложи директна средба меѓу министрите за надворешни работи, а Мицкоски веднаш му наложи на Муцунски да испрати дипломатска нота до Софија со цел, како што тогаш рече, „да почнеме да го движиме процесот“.
Четири дена подоцна тонот е сосема поинаков.
„Не очекувам потврда, не очекувам ништо“, рече Мицкоски.
Официјална потврда од Софија сè уште нема, но бугарското МНР веќе соопшти дека на конференцијата за Коридорот 8 во четврток ќе има можност за билатерална средба.
Преговори со однапред објавен песимизам
Мицкоски има право да нема големи очекувања од Софија. Односите меѓу двете земји со години се оптоварени со спорот околу европските интеграции, а позициите за уставните измени остануваат далеку една од друга.
Но дипломатски е невообичаено потенцијалниот разговор однапред јавно да се сведе на неформална средба „на коњопој“.
Ако целта е Муцунски да добие простор да разговара за гаранциите што ги бара Скопје, таквата реторика тешко ја зајакнува неговата позиција пред да влезе во разговорот.
Таа може да се чита и како обид однапред да се намали политичката цена доколку средбата не произведе резултат. Но дали станува збор за тактика или само за ниски очекувања, ќе покаже она што ќе се случи во Софија.
Брисел побара разговор, Скопје веќе го прогласи за безначаен
Фон дер Лајен го предложи директниот дијалог како прв чекор за повторно придвижување на европскиот процес.
Скопје го прифати советот и побара средба.
Софија сигнализира дека простор за разговор има.
Но пред тој разговор воопшто да започне, премиерот веќе прогнозира дека од него нема да има ништо повеќе од кратка средба на маргините.
Тоа е проблемот со денешната порака: ако Владата бара дипломатски пробив, тешко е истовремено однапред да го претставува истиот дипломатски обид како безначаен.
Сега останува Муцунски во Софија да покаже дали разговорот навистина ќе биде само „коњопој“ – или сепак почеток на дијалогот што пред само неколку дена Владата го прифати како можност за излез од застојот.
