Skip to content
Александар Вучиќ вербално се судри со хрватските новинари по денешното гласање во Нов Белград, обвинувајќи ги хрватските медиуми за мешање во изборниот процес во Србија. Кога се обиделе да му постават прашање, носителот на листата „Александар Вучиќ – Обединета Србија“ ги прекинал и побарал предност да добијат српските медиуми.
„Почекајте вие Хрватите, ова се српски, а не хрватски избори, стрпете се малку“, им порача Вучиќ.
На прашањето врз што ги темели обвинувањата за мешање на Хрватска, тој се повика на известувањето на весниците, порталите и телевизиите, обвинувајќи ги за навреди и лаги. Наместо конкретен пример за институционално мешање, на новинарот му возврати со забелешка дали добро гледа и дали знае да чита, пренесува „Тпортал“.
Вучиќ претходно изрази очекување изборниот ден да помине мирно и порача дека неговата политичка опција одговорно ќе го прифати исходот, без оглед на резултатот. Според неговата процена, победникот би можел да биде познат околу 22:30 часот.
Обраќањето следуваше по утро со значително зголемена излезност. Според процената на ЦРТА, до 10 часот гласале 19,8% од избирачите, наспроти 9,8% во истиот период на парламентарните избори во 2023 година. Маргината на грешка на процената изнесува плус или минус 0,6 процентни поени.
Гласањето трае до 20 часот, а граѓаните избираат 250 пратеници меѓу 18 изборни листи.
