Skip to content
Либерално-демократската партија бара оставки за Алта банка од министерката за финансии Гордана Димитриевска Кочовска и од гувернерот Трајко Славески, обвинувајќи ги за неодговорност и недостиг од институционална координација.
Реакцијата следува по изјавата на министерката дека не била консултирана од гувернерот за влезот на банката, како што ја пренесува ЛДП во своето соопштение. Партијата тврди и дека министерката кажала оти за случувањата се информирала исклучиво од медиумите.
За ЛДП, ваквите изјави се показател за сериозни слабости во функционирањето на институциите задолжени за финансискиот систем.
Покрај оставки и отстранување од функциите, партијата бара и поднесување интерпелација за министерката и за гувернерот. Во соопштението не се прецизира кој би ја поднел иницијативата.
Од ЛДП обвинуваат дека надлежните се дистанцираат од одговорноста во момент кога, според партијата, граѓаните се загрижени за своите заштеди и се соочуваат со блокирани сметки.
„За вакви невидени скандали не се држат прес-конференции за перење раце, туку се поднесуваат оставки на цела влада“, порачуваат од партијата.
Во реакцијата се упатуваат и пошироки критики кон економските политики на Владата. ЛДП ја обвинува за лошо управување со буџетот, прекумерно задолжување и недоволна заштита на граѓаните од банкарските провизии.
Партијата инсистира дека случајот бара политичка одговорност, а објаснувањата на надлежните ги оценува како обид за избегнување на таа одговорност.
