Skip to content
Претседателот на Сојузот на синдикатите на Македонија, Слободан Трендафилов, побара минималната плата веднаш да се зголеми на 600 евра. Во емисијата „Бизнис класа“ со Мишко Иванов, тој ги обвини Владата и работодавачите дека го игнорираат барањето на ССМ додека, според синдикалната пресметка, само трошоците за храна и пијалаци во минималната кошничка веќе надминуваат една минимална плата.
Трендафилов ја оспори употребата на просечната плата како показател за животниот стандард. „Просечната плата е еден мит во кој овие газдите и политичарите го јадат месото, а ние ги глодаме коските“, рече тој. Според бројките што ги изнесе, меѓу 260.000 и 270.000 работници земаат помалку од 600 евра. Тој рече и дека ССМ не ги добил од Управата за јавни приходи побараните податоци за бројот на вработени според висината на платата за првите девет месеци од годината.
Како аргумент дека зголемувањето е остварливо, Трендафилов ја посочи Србија, каде што, според него, минималната плата од почетокот на наредната година ќе достигне 600 евра. „Како таму да нè слушнаа што бараме ние од Македонија, а тука македонската влада стави тампони во ушите“, рече тој.
Претседателот на ССМ ја спореди минималната плата од 26.046 денари со пратеничките примања, кои, според него, се приближуваат до 120.000 денари. Ги критикуваше и разликите во начинот на кој се зголемуваат платите, посочувајќи дека кај функционерите и судиите се применуваат коефициенти за сложеност на работата, додека кај дел од вработените во јавниот сектор коефициентите остануваат замрзнати.
Според пресметката на ССМ што ја наведе Трендафилов, синдикалната минимална кошничка надминала 70.000 денари. Тој рече дека работниците со најниски примања сè почесто мора да избираат дали прво да платат сметки или да купат храна.
Трендафилов тврдеше и дека на почетокот на годината тој и неговото семејство биле следени во Велес. Тој го поврза тоа со синдикалниот ангажман и рече дека очекува разрешница од Јавното обвинителство. ССМ, додаде, не исклучува нови протести и блокади пред Владата, Собранието и Стопанската комора.
