Skip to content
Панамериканската здравствена организација (ПАХО) им го одзеде на Соединетите Држави статусот за елиминација на малите сипаници (морбили), ставајќи крај на 26-годишниот континуитет, откако утврди дека земјата не успеала да го запре континуираното ширење на вирусот повеќе од една година, објави „Волстрит журнал“ (Wall Street Journal), повикувајќи се на луѓе запознаени со ситуацијата.
Извор близок до процесот изјави за Си-Ен-Ен (CNN) дека независна комисија од експерти која поднесува извештаи до директорот на ПАХО заклучила оти САД повеќе не ги исполнуваат условите.
ПАХО ги разгледа доказите на Центрите за контрола и превенција на болести (ЦДЦ) за тоа дали еден сој циркулирал непрекинато 12 месеци или подолго, што е знак за локално ширење наместо увезени случаи. Извор запознаен со наодите на ЦДЦ изјави за Ројтерс дека агенцијата утврдила 12 месеци континуирано пренесување.
САД го држеа статусот на елиминација од 2000 година. Меѓутоа, оваа година ЦДЦ регистрираше 5.182 потврдени случаи заклучно со четврток, низ 45 сојузни држави, градот Њујорк и Вашингтон. Ова е повеќе од двојно во однос на вкупниот број од 2.289 случаи во 2025 година.
Околу 7.500 луѓе се заразиле, а 13 починале од 2025 година наваму. Речиси сите овогодишни случаи вклучуваат лица кои не биле вакцинирани или чиј вакцинален статус е непознат, а приближно еден од девет пациенти биле хоспитализирани, објави Си-Ен-Ен, цитирајќи го ЦДЦ.
Овој период е обележан со зголемено двоумење околу вакцините под водство на американскиот секретар за здравство Роберт Ф. Кенеди Помладиот, кој со години покажува скептицизам за безбедноста на вакцините против мали сипаници, без научни докази.
Експертите укажуваат на фактот дека малите сипаници можат да се спречат преку вакцинација.
„Тоа е болест што целосно може да се спречи. Несовесно е што имаме ваков обем на мали сипаници“, изјави Ноел Бруер, професор по јавно здравје на Универзитетот во Северна Каролина, кој претседава со независен советодавен панел за мали сипаници. Тој го презентираше извештајот на ЦДЦ пред ПАХО во вторникот, објави Ројтерс.
Епидемиологот од Универзитетот „Џонс Хопкинс“, Вилијам Мос, изјави за Ројтерс дека загубата на статусот ѝ штети на репутацијата на Америка како лидер во јавното здравје и значи дека големите епидемии ќе продолжат.
Директорката на ЦДЦ, Ерика Шварц, пред одлуката изјави дека агенцијата ќе продолжи да соработува со сојузните држави за да ја поттикне вакцинацијата.
За повторно да го врати статусот, една земја мора да го запре пренесувањето и да остане без епидемии најмалку 12 месеци.
