Српски организации од Косово со кривични против Вучиќ, Брнабиќ и Дачиќ за „создавање на Косово како суверена и независна држава“

Вучиќ, Дачиќ и Брнабиќ

Претставници на три српски организации од Косово во понеделникот поднесоа кривична пријава до Вишото јавно обвинителство во Белград против поранешниот српски претседател Александар Вучиќ и неколку други поранешни државни функционери, поради нивната политика кон Косово, пишува Н1.

Тие изјавија дека Вучиќ, поранешните премиери Ивица Дачиќ и Ана Брнабиќ, како и поранешниот директор на Канцеларијата за Косово во Владата на Србија, Петар Петковиќ, ги „пречекориле своите овластувања“ и придонеле за „создавање на Косово како суверена и независна држава“.

Кривичната пријава е поднесена откако Вучиќ ја загуби власта, а „Студентската листа“ победи на парламентарните избори што Србија ги одржа на 25 октомври. Пријавата ја потпишаа претседателот на Српскиот национален форум, Момчило Трајковиќ, лидерите на движењето „Татковина“ (Отаџбина), Марко Јакшиќ и Славиша Ристиќ, како и лидерите на Српскиот национален совет на Косово, Љубиша Дабиќ и Момир Стојановиќ.

Лидерите на српските организации ги обвинија поранешните функционери за растурање на институциите на Косово кои функционираа во рамките на паралелниот систем на Србија и побараа од Обвинителството да ја преиспита интеграцијата на полицијата и судството во косовскиот систем.

Потписниците, исто така, во кривичната пријава побараа преиспитување на Бриселскиот договор постигнат меѓу Косово и Србија.

Во однос на овој договор, потпишан во 2013 година, како и дијалогот за нормализација на односите меѓу Косово и Србија, со посредство на Европската унија, тие изјавија дека тој „им нанел штета на српските државни и национални интереси“.

Тие, исто така, побараа преиспитување на Вашингтонскиот и Охридскиот договор, Француско-германскиот план, како и на сите обврски што ги презела Србија.

Поднесоа кривична пријава и против Горан Ракиќ, поранешниот лидер на Српската листа, барајќи да се истражи улогата на најголемата српска партија на Косово во „можен притисок врз српското население да учествува на косовските избори“.

Повикаа и на преиспитување на начинот на кој се трошеле средствата што Србија ги вложила на Косово, наведувајќи дека постојат бројни податоци кои укажуваат на нивна злоупотреба. Претседателот на Српскиот национален форум, Момчило Трајковиќ, изјави дека со кривичната пријава бараат и истрага за убиството на косовско-српскиот политичар Оливер Ивановиќ, извршено во 2018 година во Митровица, „за да се испитаат можните поврзаности на лицата против кои е поднесена пријавата со овој случај“.

Во врска со вооружениот напад врз косовската полиција во Бањска во 2023 година, извршен од група Срби, Трајковиќ рече дека бараат проверка на финансиските текови и комуникациите, „за да се утврди дали лицата против кои е поднесена пријавата имале претходни сознанија за настанот или придонеле за него“.

Лидерите на трите српски организации изјавија дека очекуваат Обвинителството, по промената на власта во Србија, да се позанимава со прашањата покренати во нивната пријава, додека од „Студентската листа“ наведоа дека очекуваат соработка во однос на политиката кон Косово.

Каков е ставот на „Студентската листа“ за Косово?

Трајковиќ најави дека наскоро ќе ѝ ја претстави својата „стратегија за Косово“ на новата влада во Србија, но не откри детали.

„Она што го бараме е да се запрат негативните процеси на Косово и во таа насока ќе предложиме итни и стратешки мерки“, рече Трајковиќ.

Во својата програма, „Студентската листа“ наведува дека во однос на Косово ќе дејствува во согласност со Уставот, според кој Косово – кое прогласи независност во 2008 година – е составен дел на Србија.

Претставници на „Студентската листа“ го посетија Косово по нивната изборна победа, а нивниот кандидат, Емилија Марковиќ, изјави дека програмата на студентите предвидува и Уставниот суд на Србија да ги разгледа договорите постигнати во рамките на дијалогот со посредство на ЕУ.

Европската унија нагласи дека промената на власта во Србија не ги менува обврските што оваа земја ги има во процесот на нормализација на односите со Косово, вклучително и оние што произлегуваат од Договорот за патот кон нормализација, постигнат во 2023 година, како и Анексот за негово спроведување.

Со овој договор, Србија, меѓу другото, се обврза да го почитува територијалниот интегритет на Косово и да не го попречува неговото зачленување во меѓународни организации. Овој договор, кој се состои од 11 члена, меѓу другото, предвидува одредено ниво на самоуправување за српската заедница во Косово и бара од Приштина и Белград да ги спроведат и сите претходни договори постигнати во текот на 15-годишниот дијалог.

Косовскиот премиер Албин Курти, по изборите во Србија, изјави дека се надева оти Белград ќе го промени својот пристап кон Косово како независна држава и на тој начин ќе го отвори патот за целосна нормализација на односите меѓу две соседни држави.

Рацин.мк ве прашува:

Кој најмногу придонесува говорот на омраза да стане нормална појава во Македонија?

Најчитано

Рацин.мк ве прашува:

Кој најмногу придонесува говорот на омраза да стане нормална појава во Македонија?