Албанија нема да интервенира во судските случаи во Македонија, порача премиерот Еди Рама, одговарајќи на новинарско прашање за „Монструм“. Тој нагласи дека Македонија е независна и суверена држава, а ваквите прашања треба да ги решаваат нејзините институции.
На заедничкиот настан со премиерот Христијан Мицкоски на Ќафасан, Рама беше прашан зошто не ги отвора судските предмети што ги оспоруваат дел од Албанците, додека истовремено зборува за пријателството со македонските политичари.
„Прашањата кои вие ги кажувате треба да ги третираат институциите во Македонија“, одговори Рама.
Тој посочи дека Албанците во земјава имаат политички претставници преку кои можат да ги отвораат овие теми. Додаде дека комуникацијата на Тирана со албанските партии не подразбира преминување на границата кон мешање во внатрешните работи.
Рама го отфрли и проблематизирањето на неговите пријателски односи со Мицкоски и со лидерот на ДУИ, Али Ахмети. Според него, нема причина контактите да ги ограничува само на политичари од една етничка заедница.
Размената заврши со остра забелешка кон новинарот. Рама оцени дека можноста слободно да поставува прашања покажува демократски амбиент, а потоа му порача дека проблемот е во неговата глава, а не во државата.
Прашањето за „Монструм“ се однесува на судскиот предмет за петкратното убиство кај Смилковското Езеро во април 2012 година. Рама не навлезе во доказите и пресудите во случајот.

