Skip to content
„Господ да ја благослови Македонија“. Така е насловена книгата во спомен на вториот македонски претседател Борис Трајковски, на авторите Свето Стаменов и Билјана Таневска Спировска, која неодамна излезе од печат во издание на „Студентски сервис“ од Скопје, а со целосна финансиска поддршка на Фондацијата „ЗАЕВ – Едно општество за сите“.
Автор на предговорот на книгата е основачот и директор на фондацијата Зоран Заев. Во неговиот текст под наслов „Книга-споменик“ меѓу другото се вели:
„…Споменикот и не мора да биде од гранит, бронза или мермер. Тој може да биде создаден и од хартија и зборови. Нужно е тој да биде направен со почит, љубов и верба. За среќа, сè уште постојат такви луѓе кои, бидувајќи верни на својот занает, умеат тоа да го сторат повеќе од добро. Такви се познатите радио-новинари Свето Стаменов и Билјана Таневска Спировска, кои одлучиле да остават зад себе дело за почит и паметење, дело за сегашните и идните генерации, а со намера да ја одбележи 20-годишнината од трагичната смрт на претседателот Борис Трајковски“.
Вреди да се истакне дека Зоран Заев, уште во првата година од првиот мандат на неговото градоначалствување со општина Струмица, донесе одлука за подигање споменик на претседателот Трајковски во струмичкиот градски парк. Споменикот, дело на рускиот скулптор Григориј Потоцки, беше откриен во 2005 година, само една година по трагичната смрт на Трајковски. За жал, и по 20 години од неговата смрт, тоа е единствениот споменик во земјата подигнат во негова чест.
Во соопштението се истакнува дека Фондацијата Заев ги почитува и поддржува вистинските вредности како досега, така и во иднина.
