Skip to content
Не се знае кога ќе бидат исплатени сибвенциите за инвертор клима уредите за кои аплицираа граѓаните на јавниот повик на Министерството за економија во почетокот на годинава, за кои обврската ја презеде новото Министерство за енергетика, минерални суровини и рударство.
Според информациите на Рацин.мк, во МЕМСР се прави евалуација на документите иако иста таква евалуција правеше министерството за економија, под чија надлежност беа претходно документите.
Уште на почетокот на август министерката за финансии Гордана Димитриевска Кочоска,на брифингот со новинарите рече дека за оваа намена се обезбедени пари и ќе бидат исплатени по донесување на ребалансот на Буџетот.
-Прво ги скративме, но по реакција на министерот за економија Бесар Дурмиши ги додадовме средствата. Сите ќе ја добијат поддршката кога ребаласот ќе биде изгласан во Собранието, рече тогаш министерката Димитриеска Кочоска.
Јавниот повик за субвенции за клима уредите на крајот на јануари и во почетокот на февруари годинава предизвика огромен интерес кај граѓаните. Само за неколку дена колку што траеше, беа поднесени околу 8.000 барања, а заедно со другиот повик за субвенции имаше над 18.800 апликации.
Станува збор за доделување ваучери за инвертер клима-уреди согласно програмата за поттикнување енергетска ефикасност на домаќинствата за 2024 година за што беа предвидени 210.000.000 денари, како и за доделување ваучери за инвертер клима-уреди согласно програмата за заштита на ранливи потрошувачи на енергија за 2024 година за што беа предвидени 45.000.000 денари.
