Проруски групи во Молдавија со тактика од „Шарената револуција“ ги опструираат изборите и референдумот за ЕУ

Висок полициски функционер на Министерството за внатрешни работи на Молдавија изјави дека криминалните групи со руска поддршка имаат намера да ги попречат претседателските избори во Молдавија, вклучително и обиди за заземање владини згради, пишува Еуроактив.

Изборите на 20 октомври, на кои проевропската претседателка Маја Санду очекува реизбор, стануваат сè пожешки. Изборите се одржуваат заедно со референдумот за членство во Европската унија и официјални лица ги обвинуваат про-Кремљ групите дека нудат пари за гласачите за да го отфрлат плебисцитот за ЕУ.

Началникот на националната полиција Виорел Чернаутеану за Еуроактив вели дека случаите на вандали кои фрлале боја врз јавни згради минатиот месец биле претходник на посериозни дела.

„Ги гледаме намерите на таквите луѓе и овде не зборуваме само за дестабилизација на ситуацијата во земјата или за масовно неред“, изјави тој за телевизијата ТВ8.

„Тие се стремат кон поамбициозни цели, па сè до заземање државни институции“, вели тој.

Тој рече дека на оние кои стојат зад вандализмот им се исплаќаат 5.000 евра за еден инцидент.

„Јасно е дека Русија го финансира ова. Тоа не се случува едноставно така“, рече тој. „Влогот е голем“.

Чернаутеану уште рече дека повеќе од 130.000 Молдавци биле поткупени од мрежа управувана од Русија за да гласаат против референдумот и за кандидати кои се пријателски настроени кон Русија. Тој рече дека само во септември биле префрлени околу 15 милиони долари.

Бегалецот проруски бизнисмен Илан Шор, кој минатата година беше осуден во отсуство за неговата улога во кражбата на 1 милијарда долари од молдавските банки, ја предводеше кампањата против референдумот, отворено нудејќи им да плати на сите што ќе гласаат „не“.

Молдавските агенции за безбедност соопштија дека привеле двајца млади мажи по инцидентите со фрлање боја. Тие рекоа дека мажите биле дел од група од 20 кои биле обучени во Москва.

Молдавскиот суд осуди седум лица оваа недела на затворски казни до 3-1/2 години за масовни нереди за време на антивладините протести минатата година.

Санду, која ја обвини Русија дека се обидува да ја собори, води во анкетите со поддршка од 27 отсто. Ренато Усатиј, кој повикува на добри односи со Западот и Русија има 13% поддршка, додека разрешениот јавен обвинител Александр Стојаногло, кој е поддржан од промосковската левичарска опозиција, има 11%.

Анкетите покажуваат поддршка за членството во ЕУ на референдумот со 56 отсто меѓу одлучните гласачи, а 34 отсто се против.