Skip to content
Европската комисија денеска отвори формална истрага против платформата Booking.com поради сомневања дека не презела доволно мерки за заштита на корисниците од лажни огласи за сместување, интернет-измами и злоупотреба на податоците од резервациите.
Истрагата се спроведува според европскиот Закон за дигитални услуги (DSA), а ќе утврдува дали платформата соодветно ги проценувала ризиците и преземала ефикасни мерки за нивно спречување.
Посебно внимание ќе биде посветено на огласите за непостоечки сместувачки капацитети, лажното претставување на издавачи и измамите во кои корисниците добиваат пораки со барање за дополнителни плаќања.
Европската комисија ќе испитува и дали начинот на кој Booking.com ги споделува податоците за резервациите со сместувачките капацитети создава можности за злоупотреба. Под лупа ќе биде и системот за комуникација меѓу гостите и издавачите, преку кој измамниците можат да испраќаат лажни барања за плаќање.
Друг важен дел од истрагата е транспарентноста на резултатите од пребарувањето. Европските регулатори се сомневаат дека одредени сместувачки капацитети кои плаќаат повисоки провизии за подобра позиција не се доволно јасно означени како платени промоции.
Тоа значи дека корисникот може да види хотел или апартман меѓу првите резултати, без јасно да знае дека неговата позиција е поврзана со дополнително плаќање кон платформата.
Европската комисија нагласува дека резервирањето одмор треба да биде безбедно искуство и дека големите дигитални платформи имаат обврска да ги заштитат своите корисници.
Booking.com соопшти дека соработува со европските регулатори и дека останува посветен на борбата против интернет-измамите.
Отворањето на формалната постапка не значи дека прекршувањето на европските правила е веќе утврдено. Доколку истрагата потврди прекршување на Законот за дигитални услуги, компанијата може да се соочи со казна до шест проценти од својот вкупен годишен светски промет.
