Skip to content
Во Македонија утрово се активни пет пожари на отворен простор, додека уште пет се ставени под контрола, информира Центарот за управување со кризи (ЦУК). Во периодот до 07:30 часот на 7 септември се регистрирани вкупно 42 пожари, од кои 32 се целосно изгаснати.
Најсериозна е состојбата со пожарите кои сè уште се активни, особено оние што зафатиле шумски површини.
Во Општина Ѓорче Петров, пожарот кај селата Грачани и Никиштани гори во шума, а според ЦУК пожарот е активен и на територијата на Република Косово.
Активен пожар има и во Општина Чучер-Сандево, во селото Брест, на местото викано Рамно, каде што е зафатена мешана шума.
Во Струга, пожарот се движи на потегот Буринец – Локов – Селце и зафатил нискостеблеста шума.
Во Македонски Брод, активен е пожарот кај селото Белица, на местото Кајорец кон селото Брезница, кај репетиторот, каде што гори нискостеблеста и мешана шума.
Петтиот активен пожар е во Општина Брвеница, кај селото Милитино, каде што се зафатени ниска вегетација, грмушки и шума.
Уште пет пожари се водат како пожари под контрола. Во Кичево има два – кај селата Кнежино и Добреноец, каде што гори нискостеблеста шума, и кај Тајмиште, на местото Дарда, каде што е зафатена ниска вегетација. Пожар е ставен под контрола и кај селото Копаница во Општина Сарај, како и на градската депонија во Делчево. Во Старо Нагоричане, пожарот кај селото Руѓинце се проширил кон Орах, при што се зафатени ниска вегетација и нискостеблеста шума.
Најголемиот дел од пожарите, односно 32, се изгаснати. Тие биле регистрирани на различни локации низ земјата – од скопскиот регион и Кумановско, преку Тетовско, Кичевско и Струшко, до Битолско, Прилепско, Струмичко, Гевгелиско и Охридско.
Меѓу изгаснатите пожари има случаи на горење ниска вегетација и стрништа, но и пожари на диви депонии и депонии, како и случаи во близина на инфраструктура и населени места. Во Петровец, на пример, бил регистриран пожар кој зафатил ниска вегетација, овоштарник, гаража и шупа, додека во Гази Баба биле регистрирани повеќе пожари на ниска вегетација, покрај Вардар, кај клучката Арачиново и кај клучката Белви.
Пожари биле регистрирани и во Куманово, Липково, Берово, Штип, Струга, Долнени, Битола, Новаци, Гевгелија, Ново Село, Струмица, Крушево, Охрид и Градско.
Според утринскиот пресек на ЦУК, опасноста од пожари на отворен простор и натаму е присутна, особено во подрачјата каде што пламенот зафатил шумски површини и ниска вегетација.
