Skip to content
Најмалку пет лица загинаа во пожарите што беснеат околу Лос Анџелес, соопштија властите откако во областа се регистрирани веќе шест пожари од вторникот досега. Најмалку 1.500 објекти се опустошени во вториот по големина град во САД, принудувајќи над 100.000 луѓе да ги напуштат своите домови.
Ураганските ветрови дополнително ја усложнија ситуацијата особено во луксузната област Пацифик Палисадес – најпосакуваниот недвижен имот во Калифорнија што го фаворизираат холивудските познати личности.
Нов пожар избувна синоќа во Холивуд Хилс, на само неколку стотини метри од познатиот булевар Холивуд, што предизвика наредба за евакуација на главниот град на светската забава.
Началникот на пожарната служба во округот Лос Анџелес, Ентони Мароне, рече дека неговите тимови се ужаснати од обемот и брзината на катастрофите што се случуваат.
„Правиме се што можеме. Но, немаме доволно пожарникарски персонал во округот ЛА за да се справи со ова“.
Пожарот што беснее во Пацифик Палисадес проголта околу 6.500 хектари од вчера досега при што се уништени најмалку 1.000 домови и деловни објекти.
Пожар што зафати 4.300 хектари гори околу Алтадена, северно од градот, каде пламените јазици се на приградските улици.
Шерифот на округот Лос Анџелес Роберт Луна рече дека се знае дека загинале пет лица, а се стравува дека има повеќе смртни случаи.
Шефот на противпожарната служба во Пасадена, Чад Аугустин, изјави дека до 500 згради се изгубени во пожарот.
Од доцна синоќа активен е пожар во кањонот Ранион во срцето на Холивуд, блиску до историските места како што се кинескиот театар Грауман, Патеката на славните и театарот Ел Капитан.
Воведена е наредба за евакуација на голем број улици, се до булеварот Холивуд.
Извршниот директор на Одделот за вода и енергија во Лос Анџелес, Џенис Кинонес, ги замоли луѓето да штедат вода откако хидрантите во Пацифик Палисадес пресушпија.
Новоизбраниот претседател Доналд Трамп се огласи на својата платформа за социјалните медиуми тврдејќи – дека недостатокот на вода е резултат на еколошките политики на државата.
Всушност, голем дел од водата во Лос Анџелес доаѓа од реката Колорадо.
Во моментов надлежните се борат со шест пожари, од кои најновиот кој избувна е во Холивуд Хилс, на само неколку стотина метри од познатиот Холивуд булевар, што иницираше нова наредба за евакуција на засегнатите жители.
Најголемите и најразорните пожари што ја зафатија Калифорнија и градот Лос Анџелес се во луксузната област Пацифик Палисејдс, каде според „Гардијан“ гори површина од 15 832 хектари, како и областа Итон, каде се зафатени 10 600 хектари.
Пожарникарскиот оддел на Лос Анџелес издаде наредба за евакуација за неколку легендарни улици за забавната индустрија, како булеварот Холивуд, Малхоланд драјв и булеварот Лорел кањон. Во рамките на оваа област се наоѓа и театарот „Долби“, каде што се одржува церемонијата на доделување Оскари.
Иако релативно мал, пожарот Сансет гори веднаш над булеварот Холивуд и тамошната Патека на славните и би требало да помине преку автопат за да ги загрози познатиот знак Холивуд и опсерваторијата „Грифит“.
