Skip to content
Студентската листа по победата на парламентарните избори во Србија побара итни оставки од челниците на безбедносните служби, полицијата, судството, јавниот сервис и државните претпријатија. Тие порачаа дека спроведувањето на мандатот за ослободување на институциите започнува веднаш, без да се чека официјалното формирање на новата влада.
Четири дена по изборната победа на која освоија повеќе од 52 проценти од гласовите, претставниците на движењето „Студентите победуваат“ одржаа прес-конференција во Пионирскиот парк во Белград, на просторот на некогашниот камп на приврзаниците на Александар Вучиќ.
Студентите ги повикаа вработените во државните институции, судовите, банките и јавните претпријатија веднаш да пријават секакво уништување на документација, сомнителни исплати и договори од страна на заминувачката власт. Од движењето соопштија дека веќе отвораат посебна електронска адреса за свиркачи и тврдат дека актуелни и поранешни министри веќе неформално ги контактирале за пријавување неправилности.
На листата со барања за итни и неоповикливи оставки се најдоа директорот на Безбедносно-информативната агенција (БИА) Владимир Орлиќ, директорот на полицијата Драган Васиљевиќ, како и заменик-генералниот директор на Радио-телевизија Србија (РТС) Дејан Јовановиќ. За полицијата беше побарано и итно враќање на службениците кои биле преместени или разрешени од политички причини.
Во правосудниот систем, студентите побараа оставка од претседателот на Уставниот суд на Србија, Владан Петров, обвинувајќи го дека за време на кампањата постапувал како портпарол на Српската напредна партија наместо како независен судија. Оставки се побарани и од главниот јавен обвинител на Вишото јавно обвинителство во Белград, Ненад Стефановиќ, и неговиот заменик Миодраг Марковиќ, поради нарушување на начелото на непристрасност.
Победниците на изборите побараа од надлежните обвинителства итно повторно отворање и процесирање на случаите „Крушик“, „Савамала“, убиството на Оливер Ивановиќ, падот на хеликоптерот и несреќата на наплатната рампа во Дољевац. Истовремено, побарана е детална проверка на финансиските текови за капиталните проекти како ЕКСПО, Белград на вода, автопатите, проектот Рио Тинто и парите трошени за време на пандемијата.
Оставка е побарана и од директорот на Телеком Србија, Владимир Лучиќ, со образложение дека државниот монопол не смее да се користи како приватен фонд за политичка пропаганда. Од Регулаторното тело за електронски медиуми (РЕМ) е побарано во рок од седум дена да покрене постапка против телевизија Информер поради говор на омраза и навреди кон граѓаните, како и објаснување зошто оваа телевизија била исклучена од изборниот мониторинг.
Формирањето на новиот српски парламент е одложено поради прегласување на 53 избирачки места закажано за в недела, што според законските рокови ќе го одложи прогласувањето на конечните резултати, иако не може да го промени исходот од изборите.
