Мерц: Споделување на нуклеарното оружје со Франција и Британија, но не како замена за американската заштита

Следниот германски канцелар Фридрих Мерц денеска изјави дека би сакал да започне разговори со Франција и Британија за споделување на нивното нуклеарно оружје во НАТО, но не како замена за американската нуклеарна заштита на Европа.

„Споделувањето на нуклеарното оружје е прашање за кое треба да разговараме… заедно мора да станеме посилни во нуклеарното одвраќање“, рече тој во интервју за радио Дојчландфунк.

Мерц нагласи дека треба да се водат разговори со Франција и Британија, секогаш со цел дополнување на американскиот нуклеарен штит.

Германија, поради своето минато од Втората светска војна, се обврза на ненуклеарен одбранбен систем преку бројни меѓународни договори, но активно учествува во договорите за споделување на оружје во рамките на НАТО.

„Сакаме европска солидарност… но и Германија, се разбира, исто така има право да ја брани сопствената безбедност и поредок“, додаде Мерц.

Тој исто така ја повтори својата цел да ја формира владината коалиција до Велигден на 20 април.