Skip to content
„Старбакс“ неделава ќе затвори околу 250 кафулиња во Северна Америка, во вториот голем бран на затворања откако Брајан Никол го презеде раководењето со компанијата во 2024 година.
Компанијата соопшти дека по анализа на својата мрежа утврдила дека дел од локациите не остваруваат задоволителни финансиски резултати или не можат да го обезбедат искуството што „Старбакс“ сака да го понуди на клиентите. Станува збор за околу еден отсто од повеќе од 18.000 локации во Северна Америка.
„Внимателно го разгледавме нашето портфолио во Северна Америка“, им порача на вработените оперативниот директор Мајк Грамс, додавајќи дека се издвоени кафулињата за кои компанијата не гледа пат кон прифатливи финансиски резултати.
„Старбакс“ не објави список на продавниците што ќе бидат затворени, ниту колку од нив се во САД, а колку во Канада. На вработените во погодените објекти, каде што е можно, ќе им бидат понудени позиции во други кафулиња, додека останатите ќе добијат отпремнина.
Затворањето е дел од стратегијата „Back to Starbucks“, со која Никол се обидува да го врати препознатливиот концепт на кафулињата и истовремено да ги подобри финансиските резултати. Компанијата паралелно реновира дел од постојните објекти – до крајот на фискалната 2026 година планира да заврши најмалку 1.500 такви обновувања.
Новите затворања доаѓаат една година по значително поголемото кратење на мрежата. Во септември 2025 година „Старбакс“ затвори 627 локации во Северна Америка и Европа и отпушти 900 вработени надвор од кафулињата.
За сегашното реструктурирање компанијата очекува трошоци од околу 300 милиони долари. Истовремено ја намали прогнозата за нето-отворање нови локации во тековната фискална година од претходно планираните 600 до 650 на околу 440.
Сепак, затворањата доаѓаат во период кога продажбата покажува закрепнување. Во последниот квартал споредливата продажба на „Старбакс“ порасна за 7,9 отсто, над очекувањата на Волстрит, а компанијата вели дека долгорочно и натаму планира проширување на мрежата во Северна Америка.
