Skip to content
Изборите во Шведска завршија со исклучително тесен резултат, а прелиминарните податоци му даваат мала предност на централно-левиот блок пред досегашната десничарска влада на премиерот Улф Кристерсон.
Со преброен најголем дел од гласовите, блокот предводен од социјалдемократката Магдалена Андерсон се движи кон 176 места во парламентот, додека десниот блок на Кристерсон има 173 пратеници. Шведскиот парламент има вкупно 349 места, што значи дека за мнозинство се потребни најмалку 175.
Разликата меѓу двата блока е само околу 0,45 процентни поени, поради што ниту една страна сè уште не прогласува конечна победа. Треба да бидат преброени уште дел од гласовите од преостанатите изборни единици, како и гласовите од странство. Конечната слика се очекува во среда.
Социјалдемократите на Андерсон остануваат најголемата политичка сила во земјата, но евентуалното формирање нова влада може да биде комплицирано. Причината се разликите меѓу партиите од левиот блок, особено околу можната соработка меѓу Центристичката и Левичарската партија.
На десната страна, изборите беа важни и поради најавата на Кристерсон дека, доколку го задржи мнозинството, за првпат би можел да им понуди министерски позиции на Шведските демократи. Партијата досега ја поддржуваше владата од парламентот, но не беше директно дел од кабинетот.
Шведските демократи, сепак, според првичните резултати бележат пад и загуба на повеќе пратенички места, со што нивното влијание во идниот парламент може да биде помало од очекуваното.
Изборите се одржаа по четири години владеење на десниот блок, период во кој Шведска воведе построга миграциска политика и значително ги зајакна мерките против криминалните банди.
Без оглед кој ќе ја формира следната влада, не се очекува голема промена во надворешната политика на земјата. И левиот и десниот блок остануваат цврсто ориентирани кон НАТО и продолжување на поддршката за Украина.
