Skip to content
Обидот на Град Скопје да го затвори неофицијалниот пешачки премин кај Бит-пазар заврши без успех, откако група граѓани и дуќанџии излегоа на терен и го спречија поставувањето метална ограда. Преминот, кој не е означен и не е предвиден како безбедна пешачка врска, остана отворен и по интервенцијата на градските служби.
Според објавените информации, на местото се собрале претежно жители од Чаир и околните населби, кои реагирале дека преминот секојдневно го користат и дека неговото затворање би им го отежнало движењето кон Бит-пазар, Старата чаршија и објектите во близина. Дел од присутните во знак на протест го блокирале булеварот „Крсте Петков Мисирков“, по што сообраќајот бил запрен во одредени периоди.
Од СВР Скопје за ТВ21 изјавиле дека биле преземени мерки и активности за одржување на јавниот ред и мир. По полициската интервенција, состојбата се смирила, а улицата повторно била отворена за сообраќај.
Градоначалникот на Скопје, Орце Ѓорѓиевски, претходно најави дека преминот ќе биде затворен од безбедносни причини. Тој изјави дека имало барања преминот да биде легализиран, но дека Градот ја отфрлил таа можност бидејќи, според него, станува збор за ризично преминување на коловозот.
Во близина на преминот има пешачки натпатник, кој според жителите е во лоша состојба и недоволно функционален, а лифтовите поставени во него не работат со години. Токму ова е еден од аргументите на граѓаните кои се противат на затворањето на дивиот премин, додека градските власти тврдат дека безбедноста на пешаците и возачите бара физичко спречување на преминувањето на таа точка.
Засега преминот останува отворен, а пешаците и натаму ја преминуваат улицата на сопствен ризик, на делница со густ сообраќај и без официјална пешачка сигнализација.
