Скриени извештаи за Џејмс Бонд открија дека студиото сметало оти филмовите ќе бидат неуспех

Децении пред Џејмс Бонд да стане еден од најпознатите филмски ликови во историјата, филмски експерти сметале дека приказните за агентот 007 немаат потенцијал за успех, покажуваат неодамна објавени интерни документи од британското студио Елстри. 

Според извештаите, кои со децении биле заборавени и неодамна повторно откриени, вработени во студиото оцениле дека романите на Ијан Флеминг се „премногу на работ на смешното“ и дека не се добар материјал за успешна филмска адаптација. 

Документите потекнуваат од 1950-тите години, кога одделот за анализа на сценарија во студиото Елстри ги разгледувал книгите за Џејмс Бонд за да процени дали вреди да се снимаат филмови според нив. Особено остри критики добил романот „Dr. No“, кој подоцна стана првиот официјален филм за агентот 007. 

Иронијата е што проценките целосно се покажале како погрешни. Франшизата за Џејмс Бонд денес е една од најуспешните во филмската индустрија, со 25 официјални филмови и заработка од повеќе милијарди фунти ширум светот. 

Скриените извештаи биле спасени од канта за отпад пред речиси 50 години од аматерски историчар за време на расчистување во студиото во Боремвуд, но останале неотворени со децении. Документите повторно биле пронајдени дури минатата година при расчистување на неговиот дом. 

Сега архивските материјали се понудени на продажба преку издавачка куќа специјализирана за ретки книги и документи, а нивното објавување повторно ја разбуди љубопитноста околу историјата на најпознатиот таен агент во светот.