Поништен тендерот за електрични автобуси во Скопје: нов удар врз јавниот превоз

Министерството за транспорт ја поништи постапката за набавка на електрични автобуси за Скопје, со што повторно се одложува планот за модернизација на јавниот превоз и обновување на возниот парк во главниот град, каде со години се соочуваат со недостиг на исправни автобуси и нерегуларни линии.

Според информациите за јавната набавка, тендерот бил распишан со цел набавка на 150 електрични автобуси и придружна инфраструктура за полнење, но постапката не завршила со избор на изведувач, поради што проектот е вратен на почетна фаза.

Ова не е прв пат да се соочува со застој ваквиот проект, бидејќи и претходни обиди за набавка на електрични автобуси биле одложувани или поништени, што дополнително го пролонгира решавањето на проблемите во Јавното сообраќајно претпријатие Скопје.

Јавниот превоз во Скопје во меѓувреме функционира со стар возен парк и ограничен капацитет, што резултира со подолги интервали на чекање и зголемено незадоволство кај патниците, додека институциите најавуваат нови анализи и можни измени на условите за следниот тендер.