Skip to content
Шансите на Лина Ѓорческа за изненадување против Аманда Анисимова се зголемуваат како што се приближува историското деби на македонската тенисерка во главната ждрепка на Вимблдон.
Предвидувачкиот модел објавен на официјалниот сајт на турнирот во рок од еден ден за 20 процентни поени ја намали веројатноста Анисимова да ја победи Ѓорческа.
Промената не значи дека Американката повеќе не е фаворит, но покажува дека алгоритамската процена веќе не го гледа мечот како толку еднострана пресметка како непосредно по ждрепката.
Процентите ги пресметува системот „Likelihood to win“, развиен со IBM watsonx, кој обработува повеќе податоци за тенисерките, нивната форма, резултатите, рангирањето и карактеристиките на играта.
Станува збор за динамична компјутерска процена, а не за конечна прогноза или обложувачка квота. Сепак, падот од 20 процентни поени во корист на Анисимова е значително поместување пред почетокот на мечот.
Ѓорческа до главниот турнир стигна со три победи во квалификациите. Во решавачкиот меч ја декласира Италијанката Лусија Бронцети со 6-1 и 6-2 и стана првата македонска тенисерка што обезбедила настап во сингл на главниот турнир на еден гренд слем.
Токму убедливите настапи во квалификациите покажаа дека Македонката во Лондон не пристигна само за да учествува. Ѓорческа игра растоварено, има три натпревари на тревната подлога зад себе и веќе се приспособи на специфичните услови на Вимблдон.
Од другата страна ќе биде шестата тенисерка во светот и минатогодишна финалистка Аманда Анисимова. Американката е апсолутен фаворит според рангирањето, искуството и резултатите на тревна подлога, но во пресрет на турнирот немаше идеална натпреварувачка подготовка.
Анисимова во 2025 година стигна до финалето на Вимблдон, каде што загуби од Ига Швјонтек. Сега се враќа како шеста носителка и една од тенисерките од кои се очекува пласман во завршните фази.
Но првото коло носи противничка која нема што да загуби. За Ѓорческа самиот пласман е историски успех, а секој освоен гем, сет или можност за пресврт дополнително ќе го зголемува притисокот врз фаворизираната Американка.
Мечот меѓу Ѓорческа и Анисимова ќе се игра во вторник од 12 часот по македонско време. Организаторите му дадоа значајно место во програмата – дуелот е прв на теренот број 2, еден од поголемите терени во комплексот.
Македонската тенисерка влегува во мечот како голем аутсајдер, но бројките на официјалниот сајт на Вимблдон испраќаат интересен сигнал – како што се приближува почетокот, нејзините шанси растат, а предноста на Анисимова се намалува.
