Градско нуди доживување што ги обединува сите сетила – вкус, историја и природа

Туристите кои ќе го посетат Градско можат да уживаат во уникатна винска тура што комбинира природа, историја и култура. Дел од искуството вклучува јавање коњи низ лозјата на тиквешкото виногорје, дегустација на квалитетни вина во локалните винарници и запознавање со процесот на производство на виното – од лозје до чаша.

Особено атрактивна е посетата на археолошкиот локалитет Стоби, еден од најзначајните културно-историски споменици во Македонија, како и на верски храм – некогаш земјоделско училиште, заштитен со закон.

За да ја доближат автентичноста на тиквешките вина, на етикетите на одредени шишиња се вклучени географските координати на лозјата каде што се одгледува грозјето. Туристите можат да го вкусат виното, но и да го видат местото од каде потекнува.

Андон Крстевски, енолог обучен во Франција, објаснува дека сувата клима во регионот, комбинирана со обилната вода од околните планини, создава совршени услови за здрава винова лоза и висококвалитетни вина.

– Најдобар начин да се промовира едно вино е купувачот да види кои сме, да ја почувствува љубовта кон виното и да ја раскаже приказната понатаму – вели Крстевски.

Посетителите исто така можат да пробаат локални сорти како „вранец“ – омилен меѓу странците.

Министерот за култура, Зоран Љутков, ја истакна стратешката важност на Стоби за развојот на културниот туризам. Директорката на НУ „Стоби“, Силвана Блажевска, додаде дека ќе се прошири сувенирницата со производи инспирирани од археолошките предмети, за да им овозможи на посетителите незаборавно сеќавање.