„Иднината треба да нè обедини“: Муцунски со порака за идентитетот, јазикот и соработката

Министерот за надворешни работи и надворешна трговија, Тимчо Муцунски, од Софија порача дека силните идентитети не треба да се градат преку негирање или напад врз други идентитети, туку преку почитување, соработка и европски пристап кон различностите.

Говорејќи за односите меѓу Македонија и Бугарија, Муцунски оцени дека двете држави имаат заеднички интерес да се движат напред, наместо да останат заробени во теми што со години создаваат поделби.

„Јас сум цврсто убеден, како човек, дека силните идентитети немаат потреба да се градат преку напади на туѓите идентитети. Напротив, во Европа во 21. век треба да имаме капацитет да ги славиме нашите различности, да се почитуваме и да не се врзуваме со прашања поврзани со историјата, идентитетот и јазикот“, рече Муцунски.

Тој нагласи дека европската иднина треба да биде простор за соработка, а не за продлабочување на разликите. Според него, и Македонија и Бугарија имаат многу да добијат од процес што ќе ги приближи кон заеднички европски цели.

„И нашата држава, но и вашата држава имаат многу да добијат од тој процес. Имаме најпозитивни намери да соработуваме во областа на одбраната и безбедноста, економијата и образованието“, истакна министерот.

Муцунски посочи дека како универзитетски професор учествувал на бројни меѓународни конференции, меѓу кои и во Софија, и дека неговото искуство покажува оти меѓу луѓето од двете држави постои простор за разбирање и соработка.

Според него, случувањата од последните години вештачки создале поделби меѓу народите од Македонија и Бугарија, иако реалните интереси на двете земји се поврзани со иднината, европската интеграција и практичната соработка.

„Она што е значајно е да имаме поглед кон иднината, а не да останеме заробени во прашања од минатото. Прашања поврзани со идентитетот, историјата и јазикот, бидејќи имаме иднина која треба да нѐ обедини“, порача Муцунски.

Во неговото обраќање, посебно место доби и потребата од меѓусебна доверба како основа за подобри односи меѓу двете држави. Муцунски оцени дека договорените решенија од претходните години треба да се гледаат низ призмата на соработка, а не како повод за нови поделби.

„Треба да функционираме во систем кој ќе значи меѓусебна доверба“, рече министерот.

Пораката на Муцунски доаѓа во период кога македонско-бугарските односи повторно се дел од пошироката дебата за европскиот пат на земјата, уставните измени, идентитетските прашања и улогата на Бугарија во процесот на проширување на Европската Унија.

Со настапот во Софија, Муцунски се обиде да ја постави дебатата во поинаква рамка: не како судир околу минатото, туку како прашање дали двете држави имаат политички капацитет да градат доверба, соработка и заедничка европска иднина.