Skip to content
Зборувајќи за врсничкото насилство пратеничката Санела Шкријељ во интервју за Слободен печат посочи дека новите времиња ги тераат младите се повеќе време да минуваат на социјалните мрежи и дека во овој момент недостига механизам на контрола и насока за тоа што младите всушност гледаат на нивните телефони.
„Имаше едно истржување кое покажа дека 98% од младите на возраст од 15-24 години секојдневно поминуваат време на социјалните мрежи со нивните телефони. Навистина тој развој на технологијата нуди многу позитивни аспекти, но факт е дека ние немаме развиен систем како тоа да се контролира и да се насочат младите што гледаат и она што значи медиумска писменост, а знаеме дека на ниво на Европа безмалку сме на дното по медиумска писменост“, посочи Шкријељ.
Таа додаде дека и возрасните и целиот општествен амбиент имаат одговорност за зголеменото насилство меѓу младите и меѓу врсниците.
„Во оваа ера на ширење на информации, на лажни вести, но и ширење на наративи од нас, возрасните, агресијата во општеството што на секој начин се пласира, и тоа како има влијание. Јас тргнувам од нас пратениците. Што можете вие да видите од Собранието? Се и сешто, од вербална агресија до кршење на инветар, па имавме и обид за физичка ликвидација на пратеници во Собранието. Кога младите луѓе растат опкружени со такви наративи и такви слики и без да имаме осуда, туку имаме нормализирање на агресивноста , ние не можеме да очекуваме поинаков исход. Она што недостига и мора да се направи во образованието е јакнење на тие превентивни програми и јакнење на постапувањето на стручните служби во училиштата“, порача Шкријељ.
