Skip to content
Странската комисија што ги анализираше случаите поврзани со сомнежи за непотребни кардиохируршки интервенции во Македонија утврдила сомнителни наоди кај девет од 13 пациенти чии предмети биле предмет на проверка. Станува збор за пациенти на возраст од 45 до 78 години, оперирани и во приватни и во државни болници, а резултатите од анализата отвораат сериозни прашања за начинот на кој биле носени дел од одлуките за хируршки зафати.
Министерот за здравство Азир Алиу соопшти дека кај четири случаи странските експерти оцениле оти третманот бил медицински оправдан, навремен и во согласност со клиничките стандарди. Но кај останатите девет случаи, според наодите, постоеле сомнителни елементи во дијагностичката евалуација и во начинот на водење на пациентите.
Според информациите што беа објавени, кај дел од пациентите биле забележани несогласувања меѓу ангиографските снимки и писмените извештаи, по што следувале интервенции што сега се доведуваат под прашање. Комисијата оценила и дека одредени аспекти од третманот биле под очекуваните професионални стандарди и можеле негативно да влијаат врз здравствениот исход кај пациентите.
Случајот повторно ја отвори дебатата за контролата врз кардиохируршките процедури и за одговорноста во здравствениот систем. Скандалот првпат доби пошироко внимание откако кардиологот Сашко Кедев јавно алармираше дека во земјата се вршат операции на срце и кај пациенти кај кои не постоела реална медицинска потреба, со цел финансиски профит.
Министерството за здравство најави дека извештајот ќе биде доставен до Владата, Јавното обвинителство и другите надлежни институции. Тоа значи дека медицинскиот дел од случајот сега може да добие и правна димензија, особено ако истрагите утврдат дека постоеле свесни злоупотреби или системски пропусти.
Во обид да се избегне генерализација, Алиу порача дека наодите не треба да се користат за дискредитација на целата лекарска професија. Но отворањето на ваков случај, кој директно ги засега животите и довербата на пациентите, веќе создава притисок врз институциите да покажат дали системот е способен сам да се прочисти или скандалот ќе остане уште една неразјаснета афера во македонското здравство.
