Skip to content
Мрежата SafeJournalists изрази загриженост поради ескалацијата на насилството и нарушувањето на работата на медиумските работници кои известуваат за студентските протести во Албанија. Според податоците на оваа организација, во текот на првите пет дена од протестните собири, од 13 октомври 2026 година, се регистрирани најмалку 17 инциденти во кои учествувале полицајци и демонстранти.
Во соопштението се наведува дека се регистрирани случаи на физички напад, туркање, спречување на снимање и закани со апсење. Меѓу поединечните инциденти, се издвојува случајот во кој полицајци претепале новинар додека снимал употреба на сила, како и настанот од 17 октомври, кога маскирани лица физички ги попречиле новинарите кога се обиделе да му постават прашања на генералниот директор на државната полиција.
Претставниците на мрежата истакнуваат дека новинарите биле изложени на напади од страна на некои демонстранти, при што била оштетена опрема, а две новинарки биле повредени од камења за време на конфликтот на терен.
Иако Агенцијата за надзор на полицијата (AMP) покрена истрага за наводите и суспендираше седум полицајци, мрежата SafeJournalists нагласува дека сè уште не е јасно дали овие мерки се однесуваат на случаи во кои новинарите биле повредени. Дополнително, вниманието беше насочено кон политичката реторика и изјавите на службените лица, со оценка дека ваквите изјави можат да влијаат на јавната перцепција и работата на независните медиуми.
Мрежата SafeJournalists ги повика албанските власти да спроведат независни истраги за сите пријавени случаи, да обезбедат спроведување на важечки упатства за безбедноста на новинарите и да гарантираат услови за слободно известување. Во исто време, беше испратена покана до меѓународните организации и дипломатските мисии да го следат развојот на ситуацијата и да започнат дијалог со медиумските здруженија и организациите на граѓанското општество.
Соопштението го потпишаа Хрватското здружение на новинари, Независното здружение на новинари на Србија, Медиумскиот синдикат на Црна Гора, Здружението на новинари на Албанија, Здружението на новинари на БиХ, Здружението на новинари на Косово и Здружението на македонски новинари.
