Skip to content
Американското Воено воздухопловство успешно тестираше борбен авион F-16 управуван од вештачка интелигенција, во рамките на програмата VENOM што ја спроведува заедно со Агенцијата за напредни одбранбени истражувачки проекти, DARPA.
Модифицираниот F-16 полетал од воздухопловната база Еглин во Флорида, а системот со вештачка интелигенција самостојно го контролирал авионот во текот на летот. Во пилотската кабина имало тест-пилот, кој ја следел работата на системот и можел во секој момент да ја преземе контролата.
Тестовите започнале во јуни со проверка на новата опрема и безбедноста на авионот, по што во јули вештачката интелигенција првпат добила директна контрола врз леталото. Авионот е опремен со дополнителен хардвер, софтвер и инструменти што им овозможуваат на автономните системи да управуваат со летот.
Системот е развиен во рамките на програмата VENOM, кратенка од „Viper Experimentation and Next-generation Operations Model“. Специјалниот пакет е поврзан со контролите и борбените системи на авионот, без да биде променет неговиот основен софтвер. Пилотот може со едно вклучување да премине од човечко на автономно управување и обратно.
Од DARPA соопштија дека тестот покажува оти вештачката интелигенција може да се интегрира и во стандардни авиони од оперативната флота, а не само во специјално создадени експериментални летала.
Претходно, автономни системи управуваа со X-62A VISTA, силно модифицирана верзија на F-16 наменета за тестирање. Во 2023 и 2024 година вештачката интелигенција со ова летало изведуваше воздушни борбени маневри против F-16 управуван од човек. Новиот тест е значаен затоа што технологијата сега е вградена во повеќе стандардни F-16 авиони приспособени за програмата VENOM.
Следната фаза предвидува тестирање повеќе модели на вештачка интелигенција во сложени воздушни сценарија. Целта е автономните системи да можат да управуваат и координираат повеќе авиони, особено при борбени операции надвор од визуелниот дострел на пилотите.
Американското Воено воздухопловство планира преку VENOM да собира податоци за однесувањето на вештачката интелигенција во реални услови и да развива автономни летала што во иднина би дејствувале заедно со борбени авиони управувани од пилоти.
