Жештината продолжува, а доаѓаат и невремиња: Еве какво време нè чека по градови

Македонија и денес останува под влијание на многу топла воздушна маса, со температури кои во најтоплите региони повторно ќе се искачат до 40 степени, но кон крајот на неделата времето ќе стане понестабилно.

Според најновата прогноза на УХМР, во вторник минималните температури ќе се движат од 13 до 23 степени, а максималните од 35 до 40 степени. Високите температури ќе продолжат и во среда, кога дневните максимуми повторно ќе достигнуваат до 40 степени.

Поголема промена се очекува во четврток и петок. УХМР најавува услови за локална нестабилност со пороен дожд и грмежи, по повеќедневниот период на екстремно високи температури.

За утре на сила е и портокалово предупредување за високи температури во повеќе региони во земјата. Во Скопје се очекуваат околу 38 степени, а слични температури ќе има и во Струмица и Гевгелија.

Прогноза по градови за вторник, 11 август

Највисоките температури утре се очекуваат во Скопје, југоисточните делови и долж Повардарието, додека нешто посвежо ќе биде во Охридскиот регион, Пелагонија и повисоките места.

Во среда топлотниот бран нема значително да ослаби. УХМР прогнозира утрински температури од 12 до 23 и дневни од 36 до 40 степени.

Промената се очекува во четврток, кога локално ќе има услови за развој на нестабилна облачност, пороен дожд и грмежи. Според локалните прогнози, поголема веројатност за попладневни врнежи има во источните и североисточните делови, а во Берово се очекува и можност за грмежи.

И покрај нестабилноста, температурите и во четврток на дел од територијата ќе останат многу високи, со максимални вредности до околу 40 степени.