Шолц се слушнал со Путин и го повикал на сериозни разговори за Украина

Германскиот канцелар Олаф Шолц разговарал со рускиот претседател Владимир Путин за прв пат од декември 2022 година во петокот попладне, барајќи од него да започне „сериозни“ разговори со Украина.

Во телефонскиот разговор Шолц го повикал Путин да ја прекине агресивната војна против Украина и да ги повлече своите трупи, изјавија извори од германската влада.

Русија треба да „влезе во сериозни преговори со Украина со цел да се постигне праведен и траен мир за Украина“, изјави Шолц, нагласувајќи дека Русија не ги постигнала своите воени цели.

Шолц, исто така, ја истакна посветеноста на Германија да ја поддржува Украина се додека е потребно, додаваат владини извори. Вклучувањето на севернокорејските трупи се смета за „сериозна ескалација и проширување на конфликтот“.

Путин, од своја страна, подвлекол дека секој договор за решавање на конфликтот ќе мора „да ги земе предвид безбедносните интереси на Руската Федерација, да продолжи од новата територијална реалност и што е најважно, да ги елиминира основните причини за конфликтот“, објави новинската агенција ТАСС.

Тој повтори дека, според него, „актуелната криза е директен резултат на повеќегодишната агресивна политика на НАТО“.

Германските медиуми во октомври објавија дека Шолц размислува за телефонски разговор со Путин пред самитот на Г-20 следната недела во Бразил.

Во последниве месеци, Шолц постојано ја истакнува својата желба да ја доведе Русија на преговарачка маса. Тој ја кажа својата цел да одржи мировен самит со Русија по јунскиот мировен самит во Швајцарија, на кој отсуствуваа руски претставници.

Телефонскиот повик означува забележителен развој, бидејќи тоа беше прв повик меѓу двајцата лидери по речиси две години и еден од првите од кој било голем европски лидер по долго време. Францускиот претседател Емануел Макрон, исто така, последен пат разговараше со Путин во 2022 година.

Унгарскиот премиер Виктор Орбан, кој постојано одбиваше да ги прекине односите со Русија, се сретна со Путин во Москва летото, потег што наиде на огромни критики во Европа.

Во недела германскиот лидер ќе отпатува за Бразил, каде се очекува да присуствува и рускиот министер за надворешни работи Сергеј Лавров.